KRALENDIJK – Despues di a biba hopi aña na Kòrsou i a krese tambe einan, Miriam Kaddoura a disidí kasi dos aña pasá di kuminsá un kapítulo nobo na Boneiru. Loke a kuminsá komo un stap grandi pa un isla nobo i un ambiente nobo, a krese bira un bida yen di positivismo, konekshon i moveshon.
Miriam, ku rais den tantu Venezuela komo Libanon, ta traha na SGB Boneiru komo dosente di Spañó. Tambe e tin diferente otro tarea den skol. E ta duna por ehèmpel tambe materia manera lesa i komprondé, e ta aktivo den konseho di alumno i e tin un ròl komo presidente di grupo di materia. “Bon mirá mi ta hasi tur kos na skol,” e ta bisa sonriendo. “Esei ta hasi e trabou leuk.”
Deporte i move
I ta parse ku su agènda ta yenando mas i mas. Despues di orario di skol Miriam ta entretené su mes kompletamente den su otro pashon grandi: deporte i moveshon. Loke un dia a kuminsá komo un hòbi i proyekto di pashon, a krese na Boneiru bira un propio komunidat spesialmente rondó di Zumba den kombinashon ku salú i un estilo di bida aktivo.
Ounke su komienso na Boneiru no tabata fásil tur ora, Miriam a kustumbrá kompletamente awor. “Awor mi ta sinti mi di bèrdat felis akinan,” e ta konta. “Porfin mi a haña mi lugá.”
Pa Miriam Zumba ta muchu mas ku praktiká deporte so. “Pa ami Zumba ta un manera pa laga strès lòs i haña energia positivo,” e ta bisa. “Hende tin mag di tin plaser i ta su mes. No ta trata tur ora pa bo komprondé e koreografia presis, tanten ku bo ta partisipá pa move i soda.”
Movida Movement Club
Den su tempu liber e ta organisá mientrastantu diferente aktividat via su propio “Movida Movement Club.” E ta duna tur djamars, djarason i djaweps lès di Zumba di 7’or te 8’or di anochi. Djarason e ta tuma lugá pafó na Parke Isidel. Tambe e ta organisá tur djasabra di mitar di shete pa mitar di ocho di mainta aktividatnan di kore i despues Aqua Zumba den e pisina flotante, kaminda partisipantenan por partisipá na nan propio nivel.
Esun ku ke partisipá na un di e aktividatnan, mester registrá delantá via su páginanan di media sosial, Whatsapp òf e página pa registrá. Despues tur hende por uni i partisipá por ehèmpel na Zumba, Aqua Zumba of aktividatnan di kore. Segun Miriam no ta bai pa presta, pero hustamente pa motivashon i kompañerismo.
“Mi no ke laga hendenan hasi deporte so,” e ta splika. “Mi ke konstruí un komunidat kaminda hendenan ta apoyá i motivá otro. Esakinan ta tres deporte ku mi ta organisá awor. Pero den futuro ta bai bin mas proyekto.”
Partisipá ku dos pia robes
E konsepto ei ta pega klaramente. Su lèsnan ta atraé partisipantenan di diferente edat i nivel. Segun Miriam niun hende mester ta perfekto pa partisipá. “No ta importá si bo ta kore, kana òf si bo tin dos pia robes,” e ta bisa hariendo. “Tur hende ta bonbiní.”
Den su trabou na skol tambe e ta purba di inspirá hobennan na un manera positivo. Kombinando baile, kreatividat i media sosial ku enseñansa, e tin kontakto fásil ku alumnonan. “Bo ta konstruí un vínkulo siendo bo mes,” e ta bisa.
Kontakto ku otro
Miriam no a ferwagt nunka antes ku e lo tabata asina sosial i visibel. “Tempu mi tabata hóben, mi tabata hustamente hopi introvertí,” e ta konta. Pero mi kier a desaroyá mi mes i tin mas kontakto ku hende.”
Ku su energia positivo, amor pa baile i motivashon fuerte Miriam no a haña mientrastantu solamente su lugá na Boneiru, pero a konstruí tambe un komunidat kresiente kaminda salú, plaser i komunikashon ta sentral.
Òf manera e mes ta resumí bunita: “No ta ami so mester motivá bo, pero henter e grupo ta motivá otro.”