DANIA BEACH/FLORIDA – E kompania di aviashon Spirit Airlines ku ta ofresé buelonan barata a stòp di inmediato ku tur operashon. Kompania madre Spirit Aviation Holdings a anunsiá esei djasabra mainta. A anulá tur buelo i ta pidi pasaheronen pa no bai aeropuerto.
For di djasabra mainta no por reservá pasashi mas tampoko via e website di e kompania di aviashon. Te ku djabièrnè anochi si esei tabata posibel ainda.
Problemanan finansiero i gastunan di kombustibel
Segun e kompania e desishon ta konsekuensia di problemanan finansiero kontinuo, empeorá pa preis di kombustibel ku ta oumentá fuertemente. Intentonan anterior pa restrukturá i fortifiká e kompania finansieramente no a duna resultado.
Den un deklarashon e kompania ta indiká ku e oumento resien di preis di zeta i otro gastu “a influensiá e espektativa finansiero konsiderablemente”. Pasobra finansiamentu adishonal a keda sin tuma lugá, Spirit a hañ’é obligá pa un fase final kontrolá.
Ehekutivo Dave Davis ta bisa ku den luna di mart a yega na un akuerdo ainda ku tenedónan di bono tokante un plan di restrukturashon. “E subida aprupto i kontinuo di preisnan di kombustibel den e último simannan a pone finalmente sinembargo ku nos no tabatin otro eskoho,” segun Davis.
Eliminashon di Spirit tin konsekuensia tambe pa tráfiko aéreo di i pa Aruba. E kompania tabata ofresé buelonan relativamente barata for di Fort Lauderdale
Miles di trabou ta kore riesgo
Spirit tabata eksistí trintikuater aña i tabatin alrededor di djesinku mil trahadó. E kompania tabata realisá diariamente alrededor di sinkushen buelo.
Davis ta papia di un solushon “sumamente desepshonante” i ta gradisí personal, biaheronan i gobièrnu Merikano pa nan sosten i esfuersonan pa salba e kompania.
Pa mas informashon pasaheronan por akudí na e website di e proseso di eliminashon di e kompania.