Polis ta sera negoshi na Rincon i ta atvertí pa vürwèrk ilegal

RINCON – Korps Politie Caribisch Nederland (KPCN) riba dia di Rincon a intervení na varios okashon. Un negoshi ku ta bende kuminda a ser será pa violashon di e prohibishon pa bende bebida na bòter, a hasi kontròl di tráfiko durante parada i a atvertí pa presensia di vürwèrk peligroso.

Tabata alrededor di seis or di atardi e politie a intervení na un negoshi di benta di kuminda na Bulevar Miguel A. Pourier. E negoshi tabata sirbi alkohòl den bòter di glas, loke ta prohibí durante e festividatnan. Segun bosero di polis, tur empresario tabata informá di antermano tokante e reglanan i e negoshi en kestion ademas a risibí un atvertensia kaba. Sin embargo e violashon a kontinuá, despues di kua a sigui pa e seramentu.

Kontròl di tráfiko durante parada
E parada sali alrededor di 19:20 or for di e krusada di Bulevar Miguel A. Pourier i Kaya Encarnacion B. Sint Jago. Polis a kontrolá shofùrnan riba dokumentonan nesesario. Un shofùr a resultá di no tabata tin reibeweis bálido i a ser remplasá mesora. Tur prueba di alkòhol a sali negativo.

Mèldementu di vürwèrk peligroso
Polis a risibí ademas reporte di vürwèrk peligroso na varios lugá na Rincon. Segun bosero di polis a informá,e tipo di vürwèrk aki ta destiná eksklusivamente pa uso profeshonal.

Polis a hasi un yamada urgente na tur hende den Rincon pa, si nan topa ku esaki, reporta esaki diretamente via 911. Durante e periodo aki ta prohibí pa sende vürwèrk sin permit. Vürwèrk ku ta haña lo wòrdu konfiskà pa seguridat di tur hende.