KRALENDIJK – Prosesadó di sushi Selibon a reakshoná riba krítika resien riba stashonnan ambiental sushi na Boneiru. Segun e organisashon a solushoná mientrastantu e situashon por gran parti i tur e puntonan di rekohida ta na òrdu atrobe.
E imáhennan ku a publiká djaluna di kònteinernan ku tabata demasiado yen i sushi ku tabata bula rònt, a pèrkurá pa hopi asombro. Selibon ta atmití ku e situashon a sali temporalmente for di man, pero ta mustra enfátikamente riba faktornan eksterno.
Segun un bosero e dianan di fiesta i e wikènt drùk, ku aktividatnan den Rincon i Playa, tabata un motibu importante. “Nos stashonnan, inkluso playanan públiko, tabata sobrekargá durante dianan di fiesta. E komportashon di habitante- i bishitantenan, ku ta laga sushi i material ku por resiklá pa loko atras, a kondusí na un mal imáhen i aporte èkstra di nos trahadónan i nos ekipo.”
Aporte èkstra despues di periodo drùk
Selibon ta enfatisá ku e personal a traha intensivo e último dianan pa por tin e situashon bou di kòntròl. Asina por ehèmpel a limpia Rincon i e lugánan den Playa aselerá despues di eventonan i e parada.
“E asuntu a sali un ratu for di man, pero ta reanudá tur kos atrobe e dianan aki,” segun e organisashon. Pa e playanan tin alabes un limpiesa a fondo planiá riba djamars segun Selibon.
Preguntanan tokante resiklahe ta keda eksistí
E krítika no ta dirigí solamente riba e desòrdu na e stashonnan ambiental, pero tambe riba e sentido di separashon di sushi. Habitantenan ta pone interogatorio na e bakinan di koló, pasobra tin e impreshon ku ora di rekohé e sushi ta tira tur kos huntu.
Selibon ta rekonosé ku e persepshon ei ta eksistí, spesialmente den situashonnan kaminda e kònteinernan ta yen dimas. “Esei por duna e impreshon ku ta pone finalmente tur kos huntu,” e organisashon ta bisa. “Pero nos ta keda separá sushi. Ta prosesá karton i papel strukturalmente i nos ta traha aktualmente na sigui organisá prosesamentu di plèstik.”
Insertidumbre tokante resiklahe di plèstik
No tin un plan konkreto ainda pa resiklahe di plèstik na gran eskala.
Na mes momentu e kompania di prosesá sushi ta enfatisá ku resiklahe eksitoso di sushi no ta dependé solamente di e organisashon mes. “Komportashon i koperashon di habitante- i bishitantenan ta hunga un rol importante i mester mehorá.”
Ku e akshonnan di limpiesa resien ta parse ku e molèster agudo pa awor a mitigá, pero ku esaki no a resolvé e diskushon tokante solushonnan struktural i maneho di sushi efektivo riba e isla.
Komienso di aprel a entregá un petishon-WOB serka Entidat Públiko Boneiru pa haña un bista den e kontrato di kuido entre Selibon i gobièrnu. Te ku awe no a fasilitá e dokumento aki ainda.