KRALENDIJK – Na Boneiru ta lucha pa basta aña kaba ku kantidatnan grandi di sargasum ku ta yega kosta. Spesialmente na playanan manera Lagun, Foodies i Sorobon e lima di laman ta kousa hopi molèster: ku tempu e ta bai putri i e ta plama un holó penetrante. No tin un solushon definitivo ainda, pero un boluntario lokal ta dal un paso importante.
Jalmar de Jong, ku ta aktivo komo boluntario i tambe komo empresario na Sorobon, a desaroyá un harka inovativo ku bo ta pega na e parti patras di un tractor i ku ta aselerá limpiamentu di sargasum konsiderablemente. “E harka tin un alkanse di sinku meter. Mi a adapt’é tres biaha kaba pa e ta mas optimal,” e ta konta. E diseño ta sofestiká: “Mi ta hasi uso di balkinan largu i e pidanan mei mei ta latanan di barku di bela. Esei ta flèksibel i ta pèrkurá pa e motibu ei ku ta skrap e fondo limpia , algu ku te ku resien tabata hopi fastioso pa hasi.”
Segun De Jong su invento ta pone ku e boluntarionan ku ta komprometé nan mes pa tene e playanan limpi ta skapa hopi tempu. “Ku e trabou aki e ta skapa hopi ora di e boluntarionan. Hopi biaha nan tin un ora liber den siman, por ehèmpel riba djasabra, pero te ku awor nos tabatin mester di nan tur dia i sigur dos ora pa dia.”
Ta parse ku e aserkamente no ta keda sin hala atenshon. Organisashon di naturalsa STINAPA tambe a mustra interes. “STINAPA tabata impreshoná i a indiká pa wak si podisé otro aña por traha un modèl di e prototipo di por ehèmpel aluminio ku ta mas fuerte i ku por ta mihó resistente kontra salu,” segun De Jong.
E problema di sargasum ta keda sinembargo kompliká. No por reusá e lima di laman aktualmente, pasobra e ta kontené metal pisá ku ta dañino pa medio ambiente. Pa e motibu ei e úniko opshon ku a keda por lo pronto ta eliminá manualmente.