KRALENDIJK – A sentensiá na Boneiru mas ku sinku luna pasá, riba 12 di dezèmber 2025, un hòmber ku na mas ku un okashon a kometé aktonan deshonesto ku un mucha muhé di 15 aña. For di e kontaktonan seksual aki, ku a tuma lugá fin di 2023, a nase un yu. Korte den Promé Instansia di Boneiru, Sint Eustatius i Saba a imponé un kastigu di prizòn kondishonal kompleto di 12 luna.
E sospechoso, nasé na 1996, tabatin na mas ku un okashon relashon seksual ku e mucha muhé, ku a nase na 2008 i na e momento ei tabatin 15 aña. E hòmber mes tabatin 27 aña. E mucha muhé a sali na estado i a duna lus despues na un yu. Tene relashon seksual ku un persona bou di 16 aña ta kastigabel den Kódigo Penal BES, tambe si e relashon seksual tabata boluntario.
Un empleado di Kuido i Hubentut Karibe Hulandes a hasi e denunsia na luna di ougùstùs 2024, sin konsentimentu di e víktima i su famia. A detené e sospechoso na luna di mei 2025 i e tabata enkarselá pa 11 dia. Riba e huisio di 11 i 12 di dezèmber 2025 el a atmití e echonan kompletamente.
Famia no ke kastigu di prizòn
E víktima i su famia a laga sa na vários okashon ku nan no ke pa persiguí e hòmber òf pa e bai prizòn bèk. E sospechoso ta kontribuí finansieramente na kuido di e yu i ta mantené kontakto ku su yu. Tambe el a kibra e relashon ku e mucha muhé na momento ku el a haña sa su edat bèrdadero.
Fiskal a eksigí un kastigu di prizòn di 18 luna, di kual 12 luna kondishonal. Korte a desviá di e eksigensia aki i di e punto di referensia usual, ku ta indiká un kastigu di prizòn inkondishonal di tres aña pa e tipo di delito aki i a imponé solamente un kastigu kondishonal.
Konsiderashonnan di kastigu
Korte a tene kuenta ku vários sirkumstansia ku ta suavisá na momento di sentensia. Na momento di e echonan e mucha muhé tabatin 15,5 aña kaba i no tabatin vínkulo di dependensia òf preshon i ámbos partido a deskribí e relashon komo amistoso i e relashon seksual komo boluntario. Tambe e sospechoso a tuma responsabilidat mésora i traha palabrashon ku su tata i trahadónan sosial, ora e tabata sa ku e mucha muhé tabata na estado.
Reclassering Karibe Hulandes a papia positivo di e sospechoso. E no tin antesedente penal. Korte a dikta ku e 11 dianan di aresto preventivo i e kastigu kondishonal imponé tin sufisiente balor di spièrtamentu pa komunidat na Boneiru: relashon seksual ku un persona bou di 16 aña ta kastigabel i tin konsekuensia. E tempu di prueba ta dos aña