DEN HAAG - Universidat di Leiden lo kuminsá na sèptèmber 2026 ku e fundashon di un Sentro di Konosementu pa Relashonnan di Reino (Kenniscentrum Koninkrijksrelaties) na Campus Den Haag. E meta ta pa reforsá investigashon, edukashon i e debat públiko tokante e relashonnan den Reino Hulandes.
Segun e universidat, e sentro lo reuní investigadónan tantu for di e parti Karibense komo for di e parti Uropeo di e Reino. E enfoke ta prinsipalamente riba temanan polítiko, atministrativo i di gobernashon. Entre e temanan ku lo haña atenshon ta desaroyo sosio-ekonómiko, kambio di klima, migrashon, seguridat i e división di tarea den e struktura di Reino.
E inisiativa lo wòrdu dirigí dor di Wouter Veenendaal, profesor ekstrraordinario di Relashonnan di Reino, huntu ku e konsehero di komunikashon i Tanja Fraai. Tambe lo buska mas kolega den e siman nan ku ta bini.
Universidat di Leiden ta indiká ku e sentro kier trese huntu e konosementu ku aktualmente ta plamá entre diferente instansianan i isla. Na mes momento, kier krea posibilidat nobo pa kolaborashon entre universidatnan, investigadónan i tumadónan di desishon den tur parti di Reino.
Kolaborashon ku Aruba
Universidat di Aruba i De Haagse Hogeschool ta entre e instansianan ku ta spera ku lo kolaborá ku e sentro nobo. Segun Universidat di Leiden, e proyekto lo wòrdu alohá na e Fakultat di Siensianan Sosial na Campus Den Haag.