KRALENDIJK- Riba djamars 26 di mei 2026, eskritor, lesadó, artista i amante di kultura lo reuni durante e Meet & Greet Bonairian Writers: un anochi dediká na kuenta di historia, kreatividat i konekshon kultural na Boneiru.
E anochi lo keda habrí pa MC i eskritor Arjen de Wolff, kende lo duna e públiko un bon biní i un introdukshon di e programa. E evento ta posibel danki na un kolektivo di eskritornan, e programa komunidario di Terramar Museum Kòfi i Kultura i Across The Isles Foundation.
Durante e anochi, bishitantenan lo haña un bista den trabou literario nobo di diferente outor di nos komunidat. Asina Arjen de Wolff lo habri e anochi lesando for di su buki ku e ta preparando, siguí pa un presentashon literario di Wilco Harpers.
Ademas, Radinka Ustasia publisista di Maanarak of Grey lo duna un presentashon tokante publishing, skirbimentu i proyektonan kreativo nobo den sektor literario. Mas despues den e anochi, Angliet Badjoe lo lesa un fragmento for di su buki nobo Beg Me.
Un parti speshal di e anochi ta e kombersashon interaktivo ku e públiko, kaminda partisipantenan por papia ku e eskritornan i bishitanan tokante literatura, identidat, storytelling i futuro di skirbimentu den Karibe.
Komo parti èkstra di e programa, lo tin un espasio íntimo pa podcast kaminda bishitantenan i eskritornan por encontrá otro den konbersashon di kuenta di historia ku nos invitadonan specshal. Akí bishitanan lo por grabá podcast kòrtiku i kompartí nan storia personal. E espasio aki a bira posibel danki na International Council of Museums den kuadro di Dia Internashonal di Museo 2026.
E anochi lo será ku un presentashon di nos hoben talentoso Nishantaly Molina, siguí pa un brindis informal i momento di networking kaminda bishitantenan i kreativonan por sigui konosé otro.
Meta
E Meet & Greet Bonairian Writers tin komo meta pa krea un podio pa bos nobo, interkambio kultural i e forsa di kuenta di historia den komunidat Boneriano.
Mirando ku nos kapasidat di espasio ta limitá, nos ta rekomendá pa hasi reservashon adelantá via terramarmuseum@gmail.com òf pa WhatsApp na +599 701 4700.