WILLEMSTAD – Ministerio Públiko ta akusá dos empresario Kurasoleño di partisipashon na e organisashon kriminal No Limit Soldiers (NLS) i práktikanan di labamentu di plaka na gran eskala. Djaluna e kaso a bini dilanti durante Themis 2, kontinuashon di e investigashon ámplio kaminda a sentensiá anteriormente entre otro Urvin “Nuto” Wawoe pa bida largu.
Segun hustisia ta trata di e mákelar G.P. di 64 aña i e empresaria di 40 aña L.L., aktivo den limpiesa profeshonal. Ta sospechá ámbos di ta embolbí ku NLS i labamentu di sumanan grandi di plaka den e periodo 2015 te 2021.
Ta akusá G.P. ademas di eksplotashon di un banko ilegal sin pèrmit di Banko Sentral di Kòrsou i Sint Maarten. Segun Ministerio Públiko e tabata realisá transakshonnan finansiero pa terser, tabata risibí sèn di eksterior i tabata paga personanan na Kòrsou.
Hustisia ta bisa ku G.P. tabata traha entre otro ku Selwyn “Tyson” Quant, Urvin “Nuto” Wawoe i otro sospechosonan den NLS. Ta asosiá e organisashon ku entre otro trafikashon di droga, asesinato i labamentu di plaka.
Segun Ministerio Públiko serka G.P. ta trata di mas ku 844.000 florin pa loke ta trata sospechonan di labamentu di plaka, mas di 61.000 dòler Kanades, un parsela na Zuurzak Villapark i diferente sumanan di plaka ku un balor huntu di mas ku 5,1 mion florin.
Ta sosopechá L.L. di labamentu di plaka di entre otro un tereno na Zuurzak Park, un Audi Q5 i sumanan di plaka kèsh grandi. Segun hustisia esei ta representá un balor total di mas ku 1,7 mion florin.
Ministerio Públiko ta basa e sospechonan entre otro riba komunikashon SKY ECC ku a interseptá i diferente transakshon finansiero. Defensa di ámbos sospechoso a pidi pa tende Selwyn “Tyson” Quant komo testigu. Aktualmente Quant ta detené na Dubai. Mester kana un prosedura apart promé pa un eventual traslado pa Kòrsou.
E abogadonan di e sospechosonan ta hiba awe nan defensa despues ku Ministerio Públiko a presentá e eksigensianan di kastigu.