THE BOTTOM, Saba – Segun gezaghebber di Saba, Jonathan Johnson, a finalisá ofisialmente e búskeda di e kanadó perdí Erik Matthijsen. Matthijsen a pèrdè riba 13 di mei den e área di Well’s Bay durante un kaminata.
Den un deklarashon ku a emití djaweps, Entidat Públiko Saba a duna di konosé ku a tuma e desishon pa finalisá e búskeda den konsulta ku e tim di krísis, despues ku esfuersonan ámplio durante e siman ku a transkurí no a duna resultado pa haña Matthijsen.
Gezaghebber Johnson ta deskribí e desishon komo unu difísil i a ekspresá su kompashon pa famia, amigu- i koleganan di Matthijsen. “Esaki no ta e resultado ku nos tur a spera,” segun Johnson. El a añadí ku outoridatnan ta spera ku finalmente ta bini klaridat pa e sobrebibientenan.
Entidat Públiko Saba a hasi un yamada tambe riba e pueblo pa respetá privasidat di famianan di Matthijsen i a supliká un i tur ku tin informashon di su desaparishon pa tuma kontakto ku polis.
Outoridatnan a ekspresá nan gratitut na e tantísimo organisashon- i boluntarionan ku tabata embolbí den e akshon di búskeda, entre otro tim USAR.NL, polis i brantwer, Saba Conservation Foundation, Marinirnan, Ministerio di Defensa, Wardakosta i diferente ministerio Hulandes i nan partnernan lokal.
Área di Well’s Bay
A mira Matthijsen pa último biaha djarason 13 di mei den e área di Well’s Bay.