STINAPA ta wak bèk riba selebrashon 45 aña di hubileo di George ‘Kultura’ Thodé

KRALENDIJK – Resientemente a selebrá e di 45 aniversario di George ‘Kultura’ na STINAPA den un ambiente masha ameno, den presensia di famia, amigu, kolega i representante di sektor kultural. Diputado di Kultura, Timoteo Silberie, i konosedó di kultura Frans Booi tabata huntu ku representantenan di FUHIKUBO, Mangazina di Rei, Tourism Corporation Bonaire (TCB), UNESCO i Patrimonio Kultural Inmaterial, pa selebrá e hubileo di Kultura den Parke Washington. E selebrashon a tuma lugá día 13 di aprel 2026.

Vários persona a hiba palabra i a elogiá e hubilario pa su ròl den preservashon di kultura i naturalesa lokal. TCB a otorgá Kultura un plaka di mérito pa su dedikashon balioso durante tantu aña pa preservashon di naturalesa i kultura.

Entrevista

Pa garantisá ku su konosementu ta keda preservá pa futuro generashonnan, STINAPA huntu ku FUHIKUBO ta bai graba un seri di entrevista ku Kultura den e parke mes. STINAPA ta gradisí Trio Los Orgullos de Bonaire, Nishanthalie Molina, Terra Bara i tur esnan presente pa nan aporte na e dia inolvidabel aki.