ORANJESTAD – Gobièrnu di Aruba ta presentá mañan un maneho nobo pa uso di stèpnan eléktriko i skuter riba kaminda públiko. Tin preukupashon kontinuo pa uso insigur i inkontrolá NoticiaCla, ta informá.
Segun Minister di Hustisia Arthur Dowers e gabinete ta mira e situashon komo un problema serio ku a laga drumi muchu largu kaba. E ta enfatisá ku no ta trata di un fenómeno nobo, pero di un kestion ku a sigui krese pa tempu largu sin intervenshon sufisiente di gobièrnu.
E maneho nobo ta dirigí entre otro riba uso di stèp riba kaminda públiko, kaminda ta bai traha riba kontrol mas severo i un sistema di sanshon kla.
E minister ta indiká ku e problemátika ta bai mas leu ku molèster so. Segun e por papia tambe di riesgo pa siguridat públiko, kaminda spesialmente skuter i ekiponan similar ta pèrkurá pa situashonnan peligroso den tráfiko i den barionan.
Dowers ta bisa ku habitantenan den sierto kasonan ta sinti nan mes intimidá pa motibu di e komportashon di kore deskabeyá aki. Na mes momento e ta rekonosé ku lei aktual ta insufisiente pa enfrentá tur forma di komportashon efektivo. P’esei gobièrnu ta investigá kon por apliká leinan eksistente mas severo i unda reglanan nobo ta nesesario.