KRALENDIJK - Resientemente Kuerpo Polisial Hulanda Karibense(KPCN) a sertifiká ocho agente pa ‘biketeam’. Ku e ampliashon aki a reforsá e tim dor di kua e kuerpo tin sufisiente ‘biker’ na su disposishon.
E ‘biketeam’ ta eksistí for di 2009 i ta un tim di agente polisial sertifiká ku a pasa un treinen spesial. Instruktor di ‘bike’ Suandy Clarenda i Yael Soliano a duna e treinen. E agentenan a siña durante e treinen entre otro kon pa aktua di manera adekuá i seif den nan ròl komo polis riba baiskel.
E polisnan riba baiskel.
(Potrèt - KPCN )
Un di e benefisionan mas grandi ta, ku ‘biketeam’ ta hopi móbil. Nan ta mas rápido i por pasa fásil dor di multitut, hanchi smal i kayanan drùk. P’esei e ‘biketeam’ ta ideal pa patruyá durante temporada di barku krusero òf otro aktividat grandi kaminda tin hopi hende riba kaya. Por pensa riba Karnaval, Dia di Rincon i Regatta. Tambe na momentu di un notifikashon, nan por move di manera fásil di un sitio pa otro, kaminda outo no por yega fásil òf no por pasa.
Visibel
Ademas, segun KPCN, e polisnan di ‘biketeam’ ta bon visibel i fásil pa aserká. Ku esaki e tim ta kontribuí na un visibilidat amplio di polis i un mihó konekshon ku komunidat.