WILLEMSTAD – Gabinete Pisas III formalmente a kuminsá traha e siman aki bou di guia di Gilmar Pisas komo promé minister i minister di Asuntunan General. E ta responsabel pa relashonnan eksterior, asuntunan di Reino, medio ambiente i naturalesa. E sektor di energia, entre otro 2Bays, Aqualectra i Curoil, tambe ta kai bou di su kartera.
E gabinete nobo ta konsistí di e siguiente ministernan:
- Javier Silvania – Minister di Finansa i Salubridat
- Charles Cooper – Minister di Tráfiko, Transporte i Planifikashon Urbano
- Sithree van Heydoorn – Minister di Enseñansa, Siensia, Kultura i Deporte
- Shalten Hato – Minister di Hustisia
- Charetti America-Francisca – Minister di Desaroyo Sosial, Labor i Bienestar
- Roderick Middelhof – Minister di Desaroyo Ekonómiko
- Kimberly Lew-Jen-Tai – Minister di Atministrashon, Planifikashon i Servisio Públiko
- Carlson Manuel – Minister Plenipotensiario na Den Haag
E gabinete ta konsistí completamente di miembronan di partido MFK, ku ta disponé di un mayoría komfortabel di 13 asiento den parlamento. Sinku minister i e minister plenipotensiario tin eksperensia den e anterior gabinete Pisas II. Un minister te ku poko tempu pasá tabata presidente di Staten. E dos ministernan ku a sobra ta nobato, pero MFK ta deskribí nan komo ‘bon prepará, dinámiko i kla pa sirbi pais’.
Den un deklarashon na prensa e gabinete ta ekspresá su apresio grandi pa e konfiansa di pueblo i ta primintí di traha na un desaroyo duradero di Kòrsou. E kompromiso ei ta pará den e programa di gobernashon 2025-2029 bou di e título “Rumbo pa 2030! Un kompromiso nobo ku Pais Kòrsou”.
Ta deskribí e prioridatnan mas importante pa e próksimo kuater aña den e programa ei komo atendé ku enbehesimentu i e konsekuensianan di esaki pa ekonomia, fondonan sosial, sistema di kuido i finansa públiko. E gabinete ta dirigí su mes riba hasi e isla atraktivo pa hóben- i hóbennan adulto, di manera ku nan ke establesá akinan òf ke regresá despues di nan estudio.
Tambe tin haltu riba agènda kombatimentu di pobresa, diversifikashon ekonómiko i mehorashon di kalidat i sostenibilidat di sektor di kuido. Finalmente lo start un proseso integral di formashon di pais (nation building), kaminda tur minister tin un ròl. Esaki mester kondusí na mihó kalidat di bida i seguridat den bario- i famianan na Kòrsou.
Tur e medidanan aki mester kontribuí na un desaroyo positivo i sosial-ekonómiko permanente na kaminda pa 2030, ku mas bienestar i hustisia sosial pa e pueblo di Kòrsou, segun e komunikado di prensa.