KRALENDIJK - Tourism Corporation Bonaire (TCB) a firma un akuerdo di kolaborashon ku D’Su B.V., representá pa su doño Sulainie Martis, pa organisashon di e promé Bonaire Food Truck Festival. E kolaborashon akí ta nifiká un paso importante den fortifikashon mas aleu di e oferta lokal di evento na Boneiru, i na mes momentu e ta un homenahe na e kultura riku i diverso di nos isla.
E Bonaire Food Truck Festival ta tuma lugá dia 6 di yüni 2026 na Isidel Beach Park i e ta trese mas ku dies trùk’i pan lokal huntu den un ambiente vibrante na bich. E evento ta bai destaká Boneiru su kultura stimá di Trùk’i Pan, ku un oferta amplio di ‘streetfood’ ku ta varia di platonan klásiko yen di nostalgia te e sabornan kreativo lokal, inspirá pa ingredientenan boneriano.
D’Su B.V. ta organisá e festival akí, un empresa lokal ku ta dirigí su mes riba eventonan ku hopi impakto ku enfoke riba komunidat, i e no ta intenshoná solamente komo eksperensia kulinario, pero tambe komo plataforma pa sostené i promové empresarionan lokal. E trùknan di pan ku ta partisipá ta haña oportunidat pa inová, pa presentá ideanan úniko di menú i pa oumentá nan popularidat, tantu serka nos komunidat lokal komo serka nos bishitantenan.
E festival ta tuma lugá for di 18:30 or te 01:00 or i e ta transformá Isidel Beach Park den un sitio vibrante di enkuentro yen di kuminda, músika i energia komunitario. Entrada ta grátis i pues aksesibel pa tur hende.
Pa medio di e kolaborashon akí TCB ta bai promové e festival akí aktivamente, tantu riba nivel lokal komo internashonal, i TCB lo posishoná e festival komo un evento nobo i prominente riba Boneiru su kalènder di evento, den liña ku identidat di nos isla komo un destinashon kaminda kultura, komunidat i eksperensianan outéntiko ta bini huntu.
“Konsientemente nos ta invertí den eksperensianan ku ta reflehá ken nos ta komo isla”, segun Elesiër Angel, direktor di TCB. “E Bonaire Food Truck Festival ta brinda empresarionan lokal espasio pa krese i na mes momentu destaká nos kultura na un manera outéntiko, aksesibel i balioso, tantu pa nos komunidat komo pa nos bishitantenan.”
Pa mas informashon, posibilidat pa partisipá òf registrashon komo doño di stènt, interesadonan por tuma kontakto ku D’Su B.V. via DsuBonaire@hotmail.com.