AMSTERDAM – Kompania di aviashon KLM a oumentá su tarifanan pa buelonan ida i buèlta pa islanan Karibense, entre otro Boneiru, ku 100 euro. Esei un bosero di e kompania a konfirmá djaweps. E oumento di preis ta ligá ku e inkietut den Medio-Oriente i e preisnan di kombustibel ku ta subiendo.
Segun KLM e gastunan di kerozin ku a subi ta kousa di preshon riba e tarifanan. E tenshonnan geopolítiko den Medio-Oriente tin influensia pa basta tempu kaba riba preis di zeta, loke tin influensia dirèkt riba e sektor di aviashon.
Riba pregunta di biaheronan di durashon di e medida i si e ta afektá reservashonnan eksistente, KLM no a duna un kontesta konkreto. Ku esaki ta keda vago si e oumento di preis ta temporal i si pasashinan ku a reservá anteriormente ta keda intakto.
TUI i Corendon
Serka otro organisashonnan di biahe pa awor no tin kestion di oumento di preis. Un bosero di TUI, Petra Kok, ta laga sa ku TUI no a subi e preisnan ainda, pero no ta ekskluí ku esei por sosodé ainda.
Corendon tambe, ku ta bula entre otro pa Boneiru, ta tene e preisnan por lo pronto meskos. Bosero Jules van der Ven ta enfatisá ku na e momento aki no ta kobra kompensashon pa kombustibel, tantu pa reservashonnan eksistente ni tampoko pa reservashonnan nobo.
E situashon den sektor di aviashon ta keda insigur i no ta ekskluí mas kambio di preis direkshon di destinashonnan popular manera Boneiru.