KRALENDIJK – Riba 16 di aprel djesun partisipante a optené nan sertifikado pa e trayekto di trabou na midi Preparashon pa Casemanager Demensia pa Karibe (un guia fiho i independiente ku ta sostené personanan ku demensia i nan dunadónan di kuido informal durante henter e proseso di malesa). E programa intensivo aki di djestres luna a trese profeshonalnan den kuido di Saba, Sint Maarten, Sint Eustatius i Boneiru huntu ku e meta pa fortifiká kuido di demensia den region.
E preparashon tabata dirigí riba tres ròl importante. A prepará e partisipantenan komo eksperto den demensia, ku atenshon pa konosementu médiko, síkososial i étiko, meskos ku komunikashon i kuido dirigí riba persona. Tambe a prepará nan riba e rol di kordinadó di ret, kaminda union di organisashonnan di kuido i bienestar ta pará sentral. Finalmente a prepará nan komo defensornan ku ta kontribuí na mas konsientisashon di demensia den komunidat.
E grupo tabata konsistí di profeshonalnan ku diferente eksperensia, entre otro trahadónan sosial, kolaboradónan den pasadia i enfermero(a)nan di hòspital, kasnan di kuido i kuido na kas. E diversifikashon aki a kontribuí na un interkambio ámplio di konosementu i eksperensia práktiko.
Marieke Dooremalen i Saskia Danen di Akademia di Demensia a desaroyá e programa, den koperashon estrecho ku un grupo di proyekto di dunadónan di enkargo di e kuater islanan. Na tur e preparashon a konsistí di 21 dia di lès, partí den ocho enkuentro físiko na Saba i Boneiru, nuebe dia di lès online i un bishita di trabou di kuater dia na Hulanda.