KRALENDIJK/WILLEMS – Coca-Cola Curaçao ta anunsiá e di dos ganadó di e kampaña “Score with Coca-Cola” FIFA World Cup 2026™. E biha aki, e premio grandi a kai na Bonairu. Ta trata aki di yùfrou Tayeshela Keller ku a resultá e felis ganadó di un biahe ku tur gastu kubrí pa dos persona pa Kopa Mundial di FIFA 2026™ na Houston, Texas. Huntu ku su tio, Sr. Ultis da Costa e lo ta presente na e partido di futbòl entre Kòrsou i Alemania.
Tayeshela Keller huntu ku tio a purba di bai Mundial, pero di un of otro manera nan no a logra yega na un reservashon di bèrdat. Ela manda un kantidad basta di kódigo na e number di Whatsapp ku ta +5999 560 3311, kual a oumenta su chèns di gana I a result e ganadó.
“E Kopa Mundial aki ta un momentu históriko pa Kòrsou i ta p’esei nos a bai en grande pa ku e kampaña aki,” asina Myrthe George-Verhulst, Gerente di Merkadeo & PACS na Coca-Cola Curaçao a bisa. “Ta un momentu spesial pa mira kon algu asina chikitu manera manda un kódigo bou di un tapa por kondusí na un eksperensia ku lo keda ku bo pa restu di bo bida.”
Durashon
E kampaña ta kore te ku e final di Kopa Mundial dia 19 di yüli. E siguiente sorteo lo tuma lugá dia 30 di aprel. Durante e sorteo, lo tambe regalá eksperensia di Kopa Mundial pa dos persona ku tur kos inkluí. Despues lo sigui pa sorteonan adishonal ku otro premionan grandi.