KRALENDIJK - Awe sindikalismo ta pone Dia di Labor den konteksto di Derechonan fundamental humano. Na 1948 a keda firmá e DEKLARASHON UNIVERSAL DI DERECHONAN HUMANO.
Esaki ta un formalisashon pa lei di derechonan ku ta mará simplemente na e echo ku nos ta HENDE. Derechonan manera derecho riba bida, libertat di ekspreshon, derecho riba enseñansa, riba skohe filosofia di bida o religion, libertat di organisá bo mes ets. tur ta derechonan inherente na e ser HENDE. Pero apesar ku legalmente e derechonan ei ta ankrá den tratadonan internashonal i nashonal i tambe ankrá den nos konstitushon, den práktika no ta tur ora ta kumpli ku nan. Pues nos mester ta kontinuamente alerta pa eksigí kumplimentu, pa prohibí violashon di nan i hasta nos mester drenta akshon i lucha pa protehá nos derechonan, pasobra bo no ta haña nan di regalo ni nan no ta kai for di shelu. Histórikamente nos por menshoná por ehèmpel e lucha di hende muhé pa haña derecho di voto i awendia e lucha i protestanan ku e grupo di LBGTQ+ ta hiba. Pues loke aktivistanan ta hasi ta di aploudí pero realisashon i kumplimentu di e derechonan ta un responsabilidat di nos kada un i e mihó forma pa esaki ta sali den UNION.
Dia di Labor, esta 1 di mei ku nos ta rekordá i konmemorá ta netamente un di e ehèmpel klásikonan di e lucha ku e klase trahadó ku kurashi i sin miedu mester a hiba guiá pa lidernan konsiente, responsabel, komprometé i ku un gran sentido di sirbi nan próhimo mester a hiba. Kondishonnan i sirkumstansianan laboral ku e klase trahadó ta gosa di dje awe no a kai for di shelu, no a bin komo regalo, pero ta resultado di luchanan tenas ku hasta baimentu será den prisòn i ku sakrifisio di bida di lidernan. I hasta ora ku a logra pone e resultadonan aki den nos leinan, ainda mester lucha kontra violashon i abuso di e leinan ku ketu bai ta tuma lugá riba e merkado laboral aki na Boneiru i rònt mundo.
Un di e derechonan fundamental humano ankrá den Deklarashon Universal di Derechonan Humano pero tambe den e tratado pa Derechonan Sosial, Ekonómiko i Kultural i den nos konstitushon ta e derecho riba un trabou digno i e libertat di e trahadó pa skohe liber un profeshon i e derecho di por ehersé su labor den un ambiente sigur, saludabel i ku espasio pa su desaroyo personal. I e instrumentu ku e lidernan a usa i ketu bai ta usa pa eksigí kumplimentu i protekshon di e derechonan ta netamente un otro derecho fundamental ankrá den leinan internashonal i nashonal esta e derecho di e trahadó di organisá su mes den un sindikato. Ta e forsa di UNION ta e garantia pa kumplimentu di e derechonan laboral. Ta e forsa di UNION ta protehá e klase trahadó kontra abuso i eksplotashon. Ta e forsa di UNION ta eksigí Rèspèt, Rekonosementu i Rekompensa husto pa e trahadó. Ta e forsa di UNION a trese ku awe na Boneiru tin un plataforma di Diálogo kaminda e tres partneran ku rèspèt pa otro ta traha huntu pa un desaroyo sosial-ekonomiko duradero, balansá i husto pa Boneiru. 12 di mei 2023 a demonstrá kon e UNION a pone ku gobièrnu mester a kumpli ku un di e derechonan humano, esta seguridat di eksistensia i repartishon husto i balansá di nos prosperidat, ankrá den artikulo 20 di nos konstitushon. I ta riba e fundeshi aki di derechonan fundamental humano 7 lider sindikal serio, responsabel i komprometé ku e kousa di e klase trahadó i su famia na 2012 a bin huntu i selebrá 1 di mei i despues a funda dilanti notario UNION SINDIKAL BONERIANO, USIBO na 2016. Pues e aña aki USIBO lo kumpli su di dos lustro statutariamente.
Dia di Labor su profundidat ta konsenshi di liderato sindikal pa mustra e trahadó i su famia ku e kalidat di bida ku e ta gosa di dje awe, sea bo ta empleado públiko òf bo ta den sektor privá no ta regalo e ta ni ta for di shelu ela kai, sino ta resultado di lucha ku kurashi, ku fe i sin miedu pa defendé i protehá loke ta derecho di e trahadó, pero alabes sigui lucha pa kada dia mehorá kalidat di bida di e klase trahadó i su famia. Pa e mundo sindikal e mensahe ta "Huntu Fuerte, Fuerte pa tur hende." Ta di spera ku sigur miembresia lo realisá ku loke nan ta disfrutá di dje awe ta resultado di lucha di unión laboral i union sindikal ku a hiba i ta sigui hiba na interes di e trahadó i su famia. I si komo sindikalista bo no ta konsiente ku bo mester sirbi e interes i solamente e interes di e klase trahadó bo no ta sirbi pa ta sindikalista.