KRALENDIJK – Djasabra anochi tabata zona e zonido dòf di balanan di heru ku tabata lora riba e greistenchi na Sonrisa Ballpark. Timnan di dama i di kabayero ta ensayá na mésun momento riba e diferente kanchanan, tur ku e mésun meta: ta prepará pa e torneo di bolas ABCV na Kòrsou ku ta kuminsá otro siman.
E ambiente ta relahá, pero e enfoke ta klaramente presente. Esaki ta berdaderamente un ensayo pa bai Kòrsou,” hungadó Chelo Martis ta bisa mientras e ta duna su tim instrukshon. “Nos ta wak kiko por mihó, loke ta bai bon i kon nos ta bai atendé ku esaki. Aruba ta bini por ehèmpel ku 32 tim, pues e konkurensia ta grandi.”
Petra Nicolaas, presidente di federashon, ku a kaba bini for di e kancha pa ensayo ku su tim ta mira e kompromiso kresiente. “Nos ta trein tur e dianan aki,” e ta bisa. “Nos timnan ta bon, pues nos ta spera ku tur kos ta bai bon.”
Delegashon grandi ta bai Kòrsou
Boneiru ta biaha ku un grupo grandi. “Nos ta bai ku ocho tim di dama, shete tim di kabayero i tambe dos tim di hóben,” Nicolaas ta splika. “Ta dependé un tiki di kada tim kuantu hungadó ta bai, pero mayoria biaha ta entre seis i djes hungadó.”
Riba e kanchanan di Sonrisa bo ta mira esei mésora: gruponan di hungadó ta tuma turno, koach- i partisipantenan ta deliberá i aki aya ta diskutí fuertemente riba un lansamentu.
Delegashon grandi ta bai Kòrsou
Boneiru ta biaha ku un grupo grandi. “Nos ta bai ku ocho tim di dama, shete tim di kabayero i tambe dos tim di hóben,” Nicolaas ta splika. “Ta dependé un tiki di kada tim kuantu hungadó ta bai, pero mayoria biaha ta entre seis i djes hungadó.”
Riba e kanchanan di Sonrisa bo ta mira esei mésora: gruponan di hungadó ta tuma turno, koach- i partisipantenan ta deliberá i aki aya ta diskutí fuertemente riba un lansamentu.
Deporte pa grandi i chikí
Segun Nicolaas bolas ta un deporte pa un i tur. “Nos tin mas o ménos sinkuenta tim riba e isla,” e ta bisa. “Muchanan por kuminsá for di kuater òf sinku aña i por sigui te ku riba ochenta aña. E ta di bèrdat pa grandi i chikí.”
Sinembargo e deporte ta relativamente deskonosí pafó di e islanan. I esei mientras e base ta simpel. “Bo mester tira bou di e skouder i bo mester para ketu,” Martis ta splika, mientras e ta splika e diferensia grandi ku Jeu de Boules. “Si bo pone bo pia robes, e bala ei no ta konta.”
Rekreashon ku un tinta kompetitivo
Apesar di e preparashon serio e karakter di e deporte ta keda relahá. “E no ta manera futbòl òf beisbòl, kaminda tur kos ta bai rápido,” Nicolaas ta bisa. “Pa ami e ta hustamente relahante. Bo ta traha henter dia i e ora ei bo ta bini aki pa hunga un wega trankil.”
Martis ta sagudí su kabes: “Pa ami e ta simplemente un wega relahante. Pero na mes momento e ta fanátiko tambe. Bo ta bini aki djaweps, djabièrnè, djasabra i tin biaha asta djadumingu pa hunga.”
Balanan karu komo drèmpel
Un opstákulo importante pa hungadónan nobo ta e gastunan di material. Ta difísil pa haña bon bala i hopi biaha mester importá nan. “E balanan ta basta karu,” Nicolaas ta bisa. “Bo mester manda buska nan hopi biaha for di Venezuela.”
Segun hungadónan e preis por subi basta. Durante entrenamentunan ta papia di montantenan te 600 dòler pa un sèt kompleto. Martis ta konfirmá ku preisnan a subi barbaramente último añanan. “Antes bo por a kumpra un sèt pa shen dòler, pero awor e ta hopi mas karu,” e ta bisa. “Tòg bo ke tin bo propio kosnan pa por trein.” Esei ta hasié fastioso pa prinsipantenan pa kuminsá, ounke e federashon ta ofresé solushon. “Bo por hür òf fia bala via e federashon,” segun Nicolaas.
Retonan ta keda
Banda di e gastunan tin un skarsedat na fasilidat. “Nos tin añanan tratando pa haña nos propio kanchanan,” Nicolaas ta bisa. “Pa torneonan internashonal nos mester di ocho. Awor tin muchu tiki i nos mester hür hopi biaha otro kancha komo federashon.”
Kla pa e lucha
Ku un par di dia pa bai promé ku e torneo, e promé timnan ta bai Kòrsou kaba djarason awor. Nan ke prepará nan mes optimal pa e torneo. E ambishon t’ei. “Nos ta bai lucha,” Martis ta bisa. “Nos por gana.” Nicolaas ta keda trankil, pero yen di speransa: “Nos tin bon tim, pues nos ta spera riba un bunita resultado.”
Aktualmente no tin un website ofisial òf página di Facebook ainda, kaminda interesadonan por registrá pa ensayo, lès of kompetensia. Segun presidente di federashon Petra Nicolaas interesadonan por tuma kontakto direktamente via e-mail: pnicolaas@hotmail.com