KRALENDIJK – Junior Rangernan di STINAPA Bonaire resientemente a alkansá un nivel importante den nan edukashon marino ku partisipashon na un kurso di identifiká piská di ref (REEF Fish Identification). Un introdukshon práktiko di rekonosé espesienan hopi komun di piská den awanan di Boneiru. E entrenamentu a introdusí e studiantenan na e Proyekto di Investigashon di Piská Boluntario di REEF, un programa di siensia di siudadano ku ta andando pa hopi tempu kaba, ku ta empoderá personanan ku ta snòrkel i ta sambuyá pa rekohé datonan signifikante tokante e bida marino. E inisiativa mundial akí, dirigí pa Reef Environmental Education Foundation (REEF), ta yuda komunidatnan komprondé i protehá nan ekosistemanan marino lokal mihó.
Durante e kurso, nan a siña kon ta rekonosé hopi di e habitantenan konosí di ref, di e gutu kolorido te na e brant (‘blenny’) skiu, i kon pa registrá loke nan a mira hasiendo uso di método standarisá di REEF. E pakete di abilidatnan fundamental akí ta duna e Junior Rangernan e oportunidat pa kuminsá nan trayekto komo investigadónan marino, kontribuyendo ku opservashonnan ku ta yuda registrá kambionan den poblashonnan di piská i salú di ref en general. Nan partisipashon ta sostené un banko di dato global di mas ku 300.000 registro, usá pa sientífikonan, gerentenan di rekurso i organisashonnan di konservashon rònt mundu pa monitoriá tendensianan i guia desishonnan tokante konservashon.
E seshon akí tabata na enkargo di Carmen Toanchina, investigadó eksperto di REEF i Direktor di Maneho na Biodiverse Bonaire. Su guia a yuda e studiantenan konektá konseptonan sientífiko ku konservashon di mundu real, mustrando nan kon opservashon kuidadoso i kolektamentu di dato konsistente por hasi un impakto signifikante.
Pa e Junior Rangernan, e entrenamentu akí ta representá mas ku djis siña nòmber di piská, e ta marka e komienso di nan envolvimentu den siensia di siudadano i maneho marino. Dor di optené e abilidatnan akí trempan, nan ta mihó ekipá pa nota kambionan den presensia, abundansia i komportashon di espesie, tur di ku ta e indikadónan esensial di salú di ref.
E éksito akí ta un paso importante pa e programa, i nos ta wak antisipá di por sigui ku e inisiativa akí ku sosten di boluntarionan dediká i futuro gruponan di Junior Ranger. Nan entusiasmo i kuriosidat ta un señal prometedor pa futuro di esfuersonan di konservashon marino di Boneiru. Nos kier a gradisí VIP Diving pa a brinda nan sala di kurso.