KRALENDIJK – Kuantu realmente turismo di krusero ta trese Bonaire na entrada? E pregunta ta ei ta skucha hopi biaha, pero basá riba sífranan ku havenmeester Gunther Flanegin a presentá djabièrnè mainta durante e promé konferensia di turismo di aña na Delfins Beach Resort, ta mustra ku e kontribushon ekonómiko ta bastante konsiderabel.
Segun un estudio di e instituto internashonal di investigashon Business Research & Economic Advisors (BREA), pasahero di kruseronan ta gasta un promedio di 73,97 dòler pa persona ora nan ta bishitá Bonaire. Na 2025, un total di 351.763 pasahero a baha for di barku pa subi tera, lokual a nifiká un entrada total di masoménos2 6 miyon di dòler den ekonomía lokal.
Na tur Bonaire a risibí masoménos 463.000 turista di krusero na 2025, dividí entre 188 bark’i turista. Kompañianan grandi manera Royal Caribbean i Carnival ta entre esnan mas importante ku ta trese bishitante. Enkuestanan ta mustra tambe ku mayoria di e turistanan di krusero ta evaluá nan bishita na e isla positivamente.
E sifra mensual ta demostrá ku e kantidat di pasahero ta varia hopi pa temporada, ku temporada di wenter esun mas importante, mientras ku den zomer tin poko barku ta yega Boneiru. Pa aña 2026, ta antisipá un tendensia similar.
Flanegin a enfatisá ku turismo di kruseo ta, i por lo pronto lo keda un faktor económiko importante, a pesar di krítikanan ku por skucha regularmente. Spesialmente pa tiendanan, operadornan di tur, restorant i empresa di transporte, e bishitantenan aki ta un fuente importante di entrada.
Balans
Durante e reunion por a skucha tambe algun komentario krítiko. Asina, a señalá for di sektor mes ku ta importante pa visualisá e aporte di e tipo di turismo aki pa Boneiru. Tambe a remarká ku mester sigue buska un ekilibrio entre e benefisionan ekonómico i e preshon riba naturalesa i infrastruktura dje isla.