Sertifikado di apresio pa studiantenan MBO Helpende Zorg en Welzijn

KRALENDIJK- Dia 18 april 2026 MBO Bonaire a duna studiante nan di Helpende Zorg en Welzijn 2.2 (HZW2.2) un Sertifikado di Apresio. E motibu di e Sertifikado ta dor di e trabou ku e studiantenan a bini ta hasi ku nos hende grandinan di e proyekto  Adoptiegrootouder Nelly Clarinda-Kock.

E klas aki a sobresali riba tur otro klas, pasobra nan tur nan a adoptá mas ku 1 hende grandi. Nan klas ta konsistí di 18 studiante i na tur nan a adoptá 44 hende grandi. Mirandando e atenshon, dedikashon, amor i apresio nos hende grandi mes a pidi un apresio speshal pa e studiantenan aki. Yùfrou Suzette Bergland-Balentin (yùf. Suzy) ku koperashon di mener Dietrich Winklaar a organisá un weekend treining na Captain Don’s Habitat Hotel kaminda a duna un elogio na su studiantenan ku e ta mentor di nan.

E sertifikado nan a wòrdu firmá dor di nos Gezaghèber Sr. John Soliano, direktora di MBO Sra. Liset Wolff i yùfrou Suzy ku ta nan mentor. Yùfrou Simone Behagel teamleider di Zorg i Dienstverlening i mener Dietrich Winklaar tambe tabata presente na e bunita mainta aki.

Sorpresa

Tabata un sopresa grandi pa e studiantenan ku nan gezaghèber a duna nan un palabra di apresio i ku e ta orguyoso di nan pa e bon trabou ku e studiantenan ta hasi den nos komunidat di Boneiru. E studiantenan a haña e oportnidat pa hiba un kombersashon ku nan Burgervader Sr. Gezaghèber John Soliano tokante nan desaroyonan. Tabata un dia inolvidabel pa e studiantenan di MBO Bonaire.