KRALENDIJK – Diputado Timoteo Silberie ke konsultá hóbennan di Boneiru mas regularmente pa nan bos haña un lugá struktural den maneho i desishonnan di gobièrnu. E a bisa esaki despues di risibí e Konseho di Hóben pa islanan BES 2026.
E konseho ta basá riba un investigashon di UNICEF Hulanda i Ipsos I&O bou di hóbennan na Boneiru, Sint Eustatius i Saba. Hóbennan a kompartí nan eksperensianan, preokupashonnan i ideanan tokante diferente tema ku ta toka nan bida.
Pòtret: EPB
E investigashon ta mustra ku hóbennan na Boneiru no ta sinti ku gobièrnu ta skucha nan sufisientemente. Nan ta duna Entidat Públiko Boneiru un promedio di 5,4 pa e manera ku ta skucha hóben i mucha, miéntras kasi mitar ta bisa ku nan tin poko òf hopi poko konfiansa den Entidat Públiko.
Entre e tópikonan ku hóbennan ta konsiderá importante tin salú mental, tentamentu i riesgonan di seguridat for di otro pais.
Pòtret: EPB
Segun Silberie, gobièrnu no mester solamente papia tokante hóbennan, sino tambe ku nan. “Bos di hóbennan ta indispensabel ora ta traha maneho ku ta bai tokante nan futuro,” e diputado a bisa.
Silberie tin intenshon di sigui kòmbersá ku hóbennan regularmente, ku meta di tuma nan eksperensianan i ideanan mas tantu na kuenta den maneho di Boneiru.