KRALENDIJK – Kasi dos aña despues ku a kuminsá ku e proyekto pa kònteinernan di sushi bou di tera na Kaya Isla Riba den sentro di Kralendijk, no a instalá e kònteinernan ainda. A pesar di deklarashonnan anterior ku un solushon tabata serka, ta resultá despues di a puntra atrobe ku e proyekto ta pegá ainda.
Diputado Cicilia a bisa anteriormente ku e kònteinernan di bou di tera mientrastantu a yega i ku tabatin kontakto ku Selibon pa regla e instalashon. Segun Cicilia e tabata debí spesialmente na e kordinashon entre e partidonan embolbí.
Kasi dos aña despues ta parse ku e kordinashon no ta kompleto ainda.
Partidonan ta mustra riba otro
Entidat Públiko Boneiru (OLB) ta bisa riba nos pregunta ku e proyekto ta di Selibon i ku departamentu di R&O no ta impliká den esaki. Selibon sinembargo ta duna un otro punto di bista. Segun e kompania di rekohé sushi e hefe di operashonnan ta purba di haña kontakto ku R&O, pero no a logra esei te ku awor.
Tambe tin un problema segun Selibon ku e trabou sivil na e sitio. E buraku, kaminda mester bai instalá e kònteiner bou di tera, no ta bon traha segun e kompania. Mester hasi e trabounan di nobo òf adaptá nan.
Selibon mes a proponé pa hasi e trabounan. Selibon a aserká OLB si nan ke paga e gastunan pa esaki. Segun Selibon nan no a haña reakshon ainda riba esaki.
Kònteinernan t’ei kaba
E konteinernan di bou di tera mientrastantu ta na Boneiru. Sinembargo no por instalá nan ainda na Kaya Isla Riba. E trabounan preparativo no ta reglá segun Selibon i na mes momento no tin klaridat ken mester pone e siguiente stap.
Ku esaki un proyekto ku ta kanando pa dos aña kaba ta kontinuá. Anteriormente diputado Cicilia a papia di un solushon ku lo tabata serka. Te ku awor no por ripará masha for di kaya.
E diferente deklarashonnan di OLB i Selibon ta lanta ademas preguntanan nobo tokante e responsabilidatnan pa e proyekto. OLB ta bisa ku R&O no ta involukrá, mientras ku Selibon ta bisa netamente di ta wardando riba R&O.
Por lo pronto e kònteinernan t’ei si, pero no ta den uso ainda. No ta kla ki dia ta reanudá e trabounan na Kaya Isla Riba i ki dia lo ta bai hasi uso bèrdaderamente di e konteinernan bou di tera.