KRALENDIJK – Durante Bonaire Tourism Summit 2026, Tourism Corporation Bonaire (TCB) a presentá su vishon pa futuro di turismo na Boneiru. Sostenibilidat, bienestar di habitantenan, konektividat aéreo, turismo krusero i uso di teknologia tabata entre e temanan sentral durante e kumbre.
Direktor di TCB, Elesiër Angel, a presentá e plan stratégiko 2027-2037. Segun dje, e plan no ta enfoká solamente riba kantidat di bishitante, pero tambe riba konservashon di balor lokal, kapasidat ekológiko i kresementu kualitativo. TCB ta hasi investigashon tambe pa inkluí sintimentu i perspektiva di habitantenan den planifikashon turístiko.
Angel a indiká ku realisashon di e vishon di término largu lo eksigí tambe un evaluashon di e manera ku turismo ta wordu finansiá i unda ta hasi invershon. El a hasi un yamada na gobièrnu, empresanan, habitantenan i otro organisashonnan pa asumí responsabilidat konhuntamente pa futuro di turismo.
Durante e kumbre diferente eksperto lokal, regional i internashonal a papia tokante desaroyo turístiko. Marie McKenzie di Carnival Corporation a trata relashon entre kompanianan krusero i destinashonnan, miéntras Muryad de Bruin di Curaçao Tourist Board a splika kon Kòrsou ta move di promoshon di destinashon pa un modelo mas amplio di maneho di turismo.
Potrèt: TCB
Otro tópikonan tabata uso di inteligensia artifisial den sektor hotelero, konektividat aéreo di Boneiru i kolaborashon entre sektor públiko i privá. Direktor di BONHATA Veroesjka de Windt a trese e perspektiva di sektor di akomodashon, miéntras empresario Karel Visser a papia tokante e ròl di empresanan lokal den turismo.
Kapitan di haf Günther Flanegin a sera e programa ku un aktualisashon tokante turismo krusero, inkluyendo kantidat di bishita, relashon ku kompanianan krusero i e nesesidat pa tene kresementu den liña ku kapasidat di Boneiru.
E mensahe sentral durante e kumbre tabata ku futuro di turismo na Boneiru no ta dependé solamente di kresementu den kantidat di bishitante, pero tambe di sostenibilidat, konektividat, teknologia i e efekto di turismo riba komunidat lokal.