KRALENDIJK - Den kuadro di selebrashon di Dia di Rincon, Boneiru lo risibí e aña aki tambe bishitante for di isla, i paisnan alrededor. E partnernan di kadena ku huntu ta forma e ‘Multidisciplinaire Maritiem Hub Bonaire’ lo ta aktivo e aña aki tambe durante e periodo festivo aki den kuadro di tene e awanan rondó di Boneiru seif.
Duana, Koninklijke Marechaussee (KMar), Wardakosta, Kuerpo Polisial Hulanda Karibense (KPCN) i Entidat Públiko Boneiru (OLB) lo supervisá i kontrolá riba kumplimentu ku tur lei i ordenansa ku ta na vigor i di importansia pa kada partner di kadena. E servisionan lo sostené otro durante di ehekushon di e tareanan aki.
E supervishon i kòntròl lo tuma lugá den e awanan entre Kòrsou i Boneiru, rondó di Boneiru i den bahia di Kralendijk.
Duana
Duana ta supervisá tráfiko di bienes ku ta krusa frontera i ta kontrolá si ta sigui e prosedura korekto na momentu di importá, eksportá i transito i tambe si no tin artíkulo prohibí presente.
KMar
Koninklijke Marechaussee ta responsabel pa kòntròl di frontera na Boneiru. Ademas, KMar ta kontrolá dokumentonan di biahe i kondishonnan di entrada i ta kontribuí na kombatimentu di kriminalidat ku ta surpasá frontera.
Wardakosta
Wardakosta ta ehersé kòntròl riba balides di dokumentu di boto manera entre otro tarheta di registrashon i pèrmit pa nabegá. E dokumentunan aki mester ta bálido pa área di nabegá di Boneiru. Banda di esaki Wardakosta ta kontrolá tambe e kantidat di persona ku tin na bordo di un boto konforme e karchi di kùr i ta mantené órden públiko i seguridat. Tambe ta kontrolá presensia di ekiponan di seguridat, manera, entre otro, chaleko di salba bida i medionan ku ta duna señal.
KPCN
KPCN ta responsabel pa mantenshon di órden públiko i pa duna asistensia na un i tur ku mester di esaki.
Entidat Públiko
OLB ta supervisá uzo korekto di bui i kaminda di mara pa boto. Esaki ta inkluí kòntròl riba ankramentu i ta retirá bui ku no ta outorisá.
MMHB ta hasi un petishon na un i tur pa subi awa bon prepará i pa den kaso di pregunta tuma kontakto ku e servisio konserní.