WILLEMSTAD – Kòrsou ta risibí alrededor di seis mion dòler pa atendé strukturalmente ku pasado di sklabitut. E sèn ta pa kuater aña (2025-2029) i ta bai pa enseñansa, kuido, kultura i digitalisashon di archivonan.
Hulanda a otorgá e montante a base di Statüt. E sèn ta bini di direktorado general di Relashonnan di Reino.
Kuater ministerio a traha huntu na e plannan: Enseñansa, Salubridat, Desaroyo Sosial i Atministarshon. Shen representante di kuido, enseñansa, kultura i bienestar a pensa huntu durante djes seshon di diálogo.
Kuater proyekto konkreto Archivo digital
Mas ku 4000 kaha di archivo ku 2,6 mion dokumento ta bini online. Investigadó- i desendientenan di esnan hasí katibu ta haña akseso na informashon históriko. E proyekto ta pèrkurá tambe pa trabou lokal.
Enseñansa i kultura
Ta bini un maneho nashonal di museo i bukinan di skol na Papiamentu. Tambe ta bai investigá kon Hulandes i Papiamentu por kana mihó banda di otro den enseñansa. Meta: enseñasa ku ta pas mihó den e mundu di muchanan Kurasoleño.
Kuido i salubridat
Organisashonnan di kuido ta haña mas sosten. Tambe ta bini rekonosementu pa medisina Kurasoleno tradishonal. Esaki mester eliminá retraso den salubridat i restablesé konfiansa bèk.
Sosten sosial
Famianan vulnerabel ta haña ayudo ku kombatimentu di pobresa i hañamentu di trabou. Tambe ta bai komprometé pa rehabilitashon entre diferente generashon.
Gobièrnu ta mira esaki komo realisashon di primintimentunan di dezèmber 2022. Rehabilitashon ta un akshon di un solo biaha, pero un proseso ku ta dura largu pa mihó kuido, enseñansa i hustisia sosial, segun gobièrnu.