KRALENDIJK – Den e mésun anochi ku a tira un mucha hòmber di 15 aña mata na Club Rush, e Boneriano D.T. lo a tuma un arma di kandela di un amigu den un kaya serkano. D.T. ta nenga esei di nobo den apelashon. Segun D.T. riba imáhennan di video no por a mira un arma, sino un telefon.
Riba 9 di yanüari a sentensiá D.T. na 24 luna di kastigu di prizòn pa poseshon di un arma di kandela huntu ku un otro. Ministerio Públiko ke pa mantené e kastigu kompletamente den apelashon.
E kaso kontra D.T. no ta trata di e tiru fatal na Club Rush. No ta akus’é tampoko di a tira ku un arma. Sí polis ta bou di e impreshon di a mira riba imáhennan di kámara ku durante e anochi violento el a tuma un arma serka un amigu i a kargu’é.
“A sentensiá mi inhustamente. Mi no a hasi esei”, D.T. ku ainda ta detené a bisa korte. “Nunka mi tabatin un arma di kandela.”
Un kaya banda di Club Rush
Den kareda di djes pa tres di madrugá a produsí e imáhen ku ta papia di dje den Kaya L.D. Gerharts, na Hi-Tea Bonaire. Esei ta un kaya banda di Kaya Prinses Marie, kaminda Club Rush ta ubiká. E akontesimentu ku a filma pues no a sosodé dirèkt dilanti di e klup nokturno.
Remarkabel ta riba e imáhennan e kantidat grandi di hóben ku ta pará kantu di kaminda na outonan ku ta stashoná. Sitionan kaminda bo no mag para outo. Tambe ta kore motersaikel ku ta fever kuné riba kaya. Djis promé i durante e suseso ku a filma no tin agentenan polisial òf otro mantenedó di òrden visibel.
E imáhennan ta duna un bista di e anochi intrankil kaminda a tira na diferente sitio na Boneiru. Na Club Rush bala a alkansá un hóben di 15 aña den su kabes. A transport’é pa Kòrsou, pero despues el a fayesé a konsekuensia di e heridanan ku el a risibí. Na Kaya Hohokam i Kaya Karpitan tambe a hasi menshon di tirunan.
A entregá opheto patras di outo
Mientras ku tirunan tabata zona i hendenan tabata buska kaminda pa skonde, un amigu di D.T. lo a dun’é un opheto patras di un outo. Segun polis e opheto tabata lumbra i no tabata trata di un telefon.
Prokurador General ta plantiá ku riba e imáhennan por mira kon D.T. ta tene e opheto ku dos man dilanti su kurpa, hib’é banda drechi di su kurpa i despues ta hasi un moveshon ku ta parse riba karga un arma di kandela.
“Si bo mira tur rònt di bo ta tira , esei ta e momento pa pasa un telefon?”, un di e wesnan puntra.
D.T. a pèrsistí ku ta solamente su telefon el a haña bèk. “Nos no tabatin nada ke ber ku esaki”, el a bisa. Pakiko e ko-sospechoso a duna e telefon bèk hustamente e ora ei i ki ora el a fi’é anteriormente, e no por a bisa mas presis. “Ta hopi tempu pasá i nos tabata sinta chill gewon einan.”
Deklarashonnan kontradiktorio
Korte a mustra ku durante interogashonnan polisial D.T. no a deklará kada biaha e mésun kos tokante e telefon. Promé e lo a bisa ku no tabata su telefon, pa despues e deklará ku e telefon tabata di dje si.
Segun D.T. lo a komprondé probablemente robes, pasobra e ta papia Papiamentu. Polis lo a puntr’é si tin mas hende ku ta usa su telefon, pero no si ta fia el a fia su telefon.
Tambe a papia di un kòmbersashon ku a graba despues di e tiroteonan den un bùs di polis. Eiden D.T. i su ko-sospechoso a palabrá kiko nan lo bisa polis. D.T. a deklará djaluna ku durante e interogashon e tabata kansá i bon mirá no tabata ke pa interogu’é.
“Mi tin e idea ku bo ta protehando un hende”, un wes a konfront’é kuné. “Ken anto?”, D.T. a reakshoná.
No a topa ku arma
Abogado Winkel a enfatisá ku nunka a topa ku e supuesto arma di kandela. P’esei falta un determinashon ophetivo di e opheto ku ta traspasá riba e imáhennan. E sentensia ta basá spesialmente riba interpretashon di e agentenan polisial segun e abogado.
Winkel a pone interogatorio tambe na e moveshon ku segun polis parse kargamentu di un arma. E moveshon ei no ta pas ku e tipo di arma di kandela ku agentenan ta rekonosé riba e imáhennan.
Riba e telefon di D.T, a haña ilustrashonnan di arma. Segun e ta trata di arma di aire. Un arma chikitu na un bòshi di yabi su ruman hòmber lo a trese for di Colombia.
Ministerio Públiko ke dos aña di prizòn
Prokurador General a papia di un “anochi teribel pa Boneiru”. Segun Ministerio Públiko agentenan polisial eksperensiá lo a rekonosé riba e imáhennan un arma di kandela i a mira ku D.T. a karga e arma. Ministerio Públiko a pidi korte p’esei pa konfirmá e kastigu di prizòn di 24 luna. E no a apelá i a aseptá su sentensia.
E ko-sospechoso ku lo a traspasá e opheto pa D.T., tambe a haña 24 luna di kastigu di prizòn. E no a apelá i a aseptá su sentensia.
“Mi ta haña lástima ku mi ta den e situashon aki, mientras mi no tin nada ke ber ku un arma di kandela”, D.T. ta bisa durante su último palabra.
Korte ta dikta sentensia 15 di sèptèmber 2026