KRALENDIJK – E partido polítiko nobo Ánimo ke partisipá ku por lo ménos djessinku kandidato na elekshonnan di konseho insular di mart 2027. E partido no ta divulgá ainda ken ta riba e lista di kandidato. E programa di elekshon tambe ta den preparashon. Ánimo tin komo meta pa presentá esei den 2026 ainda , pero pa mas tardá promé ku karnaval.
Ánimo ta para pa Alternativa Nobo, Integro, Moderno i Orguyoso. Ocho persona a lanta e partido, entre kua e anterior diputado Nina den Heyer i wensùrfista Taty Frans. No tur fundadó ta presentá nan mes komo kandidato. Un parti di nan ta bai dediká nan mes kompletamente na organisashon di e partido.
“Nos ke tin tambe komishonnan ku ta bai okupá nan mes ku sierto tema- i tópikonan’, Den Heyer ta bisa. Pa esaki e partido ke bai den kòmbersashon ku habitante-, organisashon-, fundashon-, ministerio- i islanan hermana. “No solamente tokante e pregunta kiko ta pasando, pero mas importante: Kiko nan ta mira komo posibel solushonnan?”
Ningun promesa deskabeyá
Segun Den Heyer mester desaroyá e programa di partido mas konkreto posibel. “Nos ke enfoká hopi riba resultado. Esei ta nifiká ku nos no ta bai hasi promesa ku no por realisá. Ningun idea grandi, ekstremo i deskabeyá, pero pone e temanan krusial na òrdu.”
Ku esaki segun Den Heyer Ánimo ke distinguí su mes for di partido- i polítikonan ku ta purba di atraé voto ku deklarashonnan populista. “Mas populista bo trese e kosnan dilanti i mas deskabeyá e ideanan ta, si bo no a hasi investigashon i no por mustra kon bo ta pone algu kana, e no tin sentido.”
Den Heyer ta haña ku último añanan polítika na Boneiru a keda pegá den konsulta i kontrastenan mutuo. “A papia hopi i a tuma ménos akshon. Tin biaha no a tuma akshon mes, no pasobra e idea no ta bon, pero pasobra e idea a bini di un hende ku bo no gusta. Nos mester stòp ku esei.”
Programa promé ku karnaval
Ánimo ta hasi su esfuerso pa publiká e programa di elekshon fin di 2026 òf sino na luna di yanüari 2027. E partido no ke warda te serka dilanti di elekshonnan. Algu ku den pasado si a sosodé hopi serka otro partidonan polítiko.
Si despues otro partido por tuma/kopia proposishonnan di Ánimo, no ta un problema pa Den Heyer. “Si nan tuma idea for di dje i pone nan den nan programa di partido tambe, e ora ei aparentemente nos tur ta haña ku e ta importante. No ta trata ken ta hasié, basta e sosodé.”
Den Heyer no ke divulgá nòmber di e kandidatonan ainda. E ta haña ku mester prepará posibel kandidatonan bon promé riba konsekuensianan di un karera polítiko.
“Bo mester bai hasi sakrifisio. Den sierto kaso bo ta bai atras den salario i bo no tin privasidat mas. Ta bini preshon riba bo, pero riba bo famia tambe. Bo mester prepará bo famia tambe riba esaki.”
Gastunan mester baha
Ora a puntr’é pa menshoná algun problema grandi na Boneiru Den Heyer ta bisa ku Ánimo no ke wak entradanan haltu so, pero hustamente tambe baha gastunan di kosto di bida.
“Ta bisa konstantemente ku salarionan mester subi. Pero nos ta mira algun aña kaba ku ora salarionan subi, gastunan tambe ta subi. P’esei nos mester pone mas atenshon na bahamentu di gastu. Pa loke ta trata esei nos mester ta hopi kla direkshon di Den Haag tambe.”
E ta rekonosé ku Boneiru pa motibu di importashon di produkto ta hopi dependiente di desaroyonan pafó di e isla. “Mi ta konsiente ku lo no ta fásil. Pero no mester pèrdè for di bista si ku no por sigui asina ku tur e oumentonan di preis ei.”
Tambe mester aspirá fasilidatnan igual dentro di Hulanda segun Den Heyer. Esei no ta nifiká ku medidanan na Boneiru mester ta presis meskos ku na Hulanda Europeo.
“E no mester ta e mésun método, pero e resultado ku bo ke logra si mester ta igual. Si Hulanda tuma un disposishon pa solushoná sierto problema, e mésun pensamentu mester konta aki tambe.”
Merkado di bibienda ku a stanka
Durante e kòmbersashon a papia tambe di e merkado di bibienda ku a stanka. Den Heyer ta mira spesialmente un problema ku kasnan ku personanan ku no ta bin biba na Boneiru ta kumpra i despues ta hür nan na turista òf habitantenan temporal.
“Tin manera ku por impedí esei òf hasié difísil. Den diferente munisipio nos ta mira por ehèmpel un obligashon pa bo mes bai biba aden. Tin método- òf bareranan ku bo por plantia komo isla.”
Tambe e ta mustra riba posibilidatnan di finansiamentu limitá di e korporashon di bibienda. “Serka nos e korporashon di bibienda mester bai bankonan komersial. Esei ta hasi konstrukshon di kas mas karu. Ta bini aserka ku entidat públiko mes no por fia sèn i no por para garantia tampoko.”
No tin solushon simpel pa èrfpagt
Den Heyer ta atvertí ku un diputado nobo no por solushoná tratamente poko poko di èrfpagt i pèrmitnan den algun luna.
“Aña’den aña’fó diputadonan nobo ta kuminsá ku hopi energia i ánimo. Pero di un òf otro manera e no ta bai.”
Segun Den Heyer mester keda kla promé kaminda e proseso ta stanka. “Ta entregá petishonnan ku no ta kompleto? Òf petishonnan ta keda drumi un kaminda? Mester bini klaridat den esei. Despues bo mester ta onesto: esaki ta traha òf e no ta traha, e hende por e trabou òf mester di hende èkstra pa traha?”
Mester wak e organisashon interno di Entidat Públiko Boneiru tambe. E no ta boga pa un reorganisashon grandi mesora. “Nos mester wak kada departamentu si e ta funshoná ku e hendenan i prosesonan di trabou ku nos tin awor. Kon nos por mehorá esei?
Boneiru no por solushoná problema di sushi su so
Den Heyer ta hopi kla tokante e problemanan ku prosesadó di sushi Selibon i Lèntfel Lagun. “Boneiru no por solushoná esei su so. Nos mester di ayudo di afó, tantu finansieramente komo riba tereno di ekspertisio.”
Segun Den Heyer e islanan mes no tin tur spesialista nesesario. “Pió ainda, mi ta kere ku niun di e seis islanan por esaki su so. Sushi ta un problema riba tur e islanan. Nos mester rekonosé esei huntu.”
No tin un pronóstiko di asiento ainda
Den Heyer no ke pronostiká kuantu asiento Ánimo por haña. E ta spera riba sufisiente apoyo pa por ehersé su influensia. E no ta ekskluí partisipashon na un kolegio ehekutivo, pero un lugá den koalishon no ta un meta riba su mes segun Den Heyer.
“E meta ta ku nos por hasi loke nos ta bisa i loke nos ke bai hasi. Si bini un koalishon kaminda nos sa kaba ku nos no por realisá loke nos a primintí, e ora ei nos no mester partisipá kueste loke kueste na e koalishon ei.”