WILLEMSTAD – Kòrsou ta enfrentá un eskases grandi di bibienda ku ta adekuá pa hendenan di edat avansá. Segun un análisis di ekonomista i investigadó Roland O.B. van den Bergh falta segun kálkulo alrededor di sinku mil kas pa grandinan, mientras e isla ta envehesiendo rápido i e demanda pa bibienda adekuá pa grandinan ta oumentá rápido.
For di investigashon a sali na kla ku mientrastantu Kòrsou tin un poblashon hopi envehesé. Mas o ménos 25,2 porshento di habitantenan ta 65 aña òf mas bieu. Ku esaki e isla ta pertenesé segun e análisis na e komunidatnan mas envehesé na mundu. E espektativa ta ku e parti aki lo sigui oumentá e añanan benidero, spesialmente pasobra e kantidat di 80-plùs ta oumentá.
Pero pa e grupo di grandinan aki ku ta kresiendo apenas tin bibienda adekuá disponibel. Na Kòrsou tin awor mas o ménos 375 kas pa grandi, mientras e demanda ta mas grandi. Listanan di espera na entre otro Fundashon Kas Popular, Fundashon Birgen di Rosario i Parke Residensial Zeelandia ta eksisití segun e investigashon mas ku sinku aña kaba.
Proyektonan di konstrukshon nobo
Un motibu importante ta ku proyektonan di konstrukshon nobo ta dirigí spesialmente riba kasnan di famia tradishonal i apartamentu. Segun e outor eseinan mayoria biaha no ta adekuá pa habitantenan mas grandi ku ta ménos movibel pero si ke keda biba independiente.
Kasnan eksistente tambe hopi biaha no ta adaptá na edat, pasobra nan tin por ehèmpel mas piso, trapi òf porta smal.
Propio kas
Segun e investigashon mas o ménos ochenta porshento di e 65-plùsnan ta biba den nan propio kas . Hopi di e kasnan ei ta konstruí entre 1950 i 1980 i ta eksigí relativamente hopi mantenshon. Pa habitantenan mas grandi esei por kondusí na gastunan mas haltu i un chèns grandi riba aksidentenan den kas.
P’esei e outor ta boga pa mas atenshon pa e asina yamá kasnan resistente na siklo di bida: kasnan na nivel di kaya, ku no tin drèmpi i ku ta trahá pa personanan ku mobilidat limitá. Tambe insentivanan fiskal òf supsidio por yuda pa ahustá bibiendanan eksistente, di moda ku grandinan por keda biba mas largu independientemente eiden.
Segun Van den Bergh konstrukshon di bibienda pa grandinan ademas por tin otro efekto tambe riba merkado di bibienda. Ora grandinan muda pa bibiendanan mas chikitu i mihó ahustá, kasnan grandi ta bini liber pa famianan mas hóben, loke por aliviá e preshon riba merkado di bibienda.
E investigashon ta basá riba estudio di dokumento, entrevista- i kòmbersashonnan ku organisashon- i gruponan di grandinan na Kòrsou.