KRALENDIJK – Djamars último ku orguyo Boneiru a yama bon biní na Scenic Eclipse na okashon di su promé bishita na nos isla, loke ta marka un logro spesial den Boneiru su programa krusero.
Kordialmente i ku un seremonia festivo di bon biní na honor di e promé bishita akí, Tourism Corporation Bonaire (TCB), huntu ku kapitan di haf i e agente di barku lokal Maduro, a risibí e barku, ku 179 pasahero i 196 miembro di tripulashon na bordo, bou di komando di kapitan Erwan Le Rouzic.
Scenic Eclipse, konosí komo e promé Discovery Yacht na mundu, ta representá un segmento nobo den e industria krusero, kaminda ta kombiná ultraluho ku biahamentu den estilo di ekspedishon. E yate ta diseñá pa akomodá maksimalmente 228 wéspet den suitenan ku propio balkon i servisio di bùtler, i e ta ofresé un eksperensia di biahe sumamente personalisá i fasinante.
Loke ta hasi e barku akí asina spesial, ta ku e por biaha pa destinashonnan mas apartá i ménos konvenshonal, danki na fasilidatnan úniko na bordo, inkluyendo dos helikòpter, un supmarino i ekipo di ekspedishon, manera Zodiacs. Di e manera akí e wéspetnan por eksplorá destinashonnan na un manera mas íntimo i ku mas enfoke riba loke nan ta eksperensiá.
E tipo di barku akí ta konektá estrechamente ku Boneiru su rumbo stratégiko pa atraé bishitante di balor haltu ku ta respetá nos kultura i medio ambiente, i ku ta en buska di eksperensianan signifikativo dirigí riba naturalesa.
“Nos ta orguyoso di por yama Scenic Eclipse bon biní pa promé biaha na Boneiru,” segun Elesiër Angel, direktor di TCB. “Binida di Scenic Eclipse ta suprayá e forsa di atrakshon kresiente di Boneiru den e segmento ‘niche’ di biahenan krusero luhoso i di ekspedishon, i ku esaki e ta fortifiká posishon di nos isla komo un destinashon den área karibense ku ta konosí pa su bunitesa natural i su outentisidat.”