ORANJESTAD – Aruba kier sigui desaroyá su aeropuerto pa konbertí esaki den un sentro digital modèrno pa e biahero internashonal. E isla ta trahando riba teknologia ku lo permití biaheronan pa kompartí nan pasport digital via nan telefòn i pasa imigrashon mas lihé usando rekonosimentu fasial.
Esaki a sali na kla durante un tur na Aeropuerto Internashonal Reina Beatrix pa Promé Minister Hulandes Rob Jetten komo parti di su bishita ofisial na Aruba.
Durante e presentashon, e delegashon Hulandes a risibí splikashon tokante diferente inovashon teknológiko na aeropuerto, inkluyendo e proyekto 3DXVerse. Esaki ta wòrdu desaroyá den kolaborashon ku Union Eùrope komo parti di e asina yamá proyekto Horizon, huntu ku universidatnan i kompanianan Oropeo.
Smartphone
Sentral den e proyekto ta loke nan yama digital travel credentials. Biaheronan lo por parti informashon di biahe i identidat digital ku autoridadnan di imigrashon via nan selular di antemano, promé ku nan yega na Aruba.
Banda di esaki, teknologia biométriko i rekonosimentu fasial lo wòrdu uzá na e-gatesnan. Segun aeropuerto, e identidat di biaheronan por wòrdu verifiká den algun sekònde, lokual mester redusí konsiderablemente e tempu di espera na imigrashon.
Sostenibeldat
E aeropuerto lo konektá su inovashonnan teknológiko ku sostenibeldat. E sistema, entre otro kos, lo visualisá e impakto ekológiko di biahe. Den futuro, biaheronan por haña bista den nan propio emisishon i partisipá den proyektonan lokal di kompensashon, manera plantamentu di palu di mangel.
E bishita tambe a duna un bista di e sistema di ekipahe mehorá i e fasilat di pre-clearance Merikano na Aruba. Danki na e fasilidat aki, biaheronan por pasa imigrashon Merikano na Aruba mes promé ku nan sali pa Merka.