Kompania di hür outo na Boneiru ta ofresé rekompensa despues di kiebro i ladronisia

KRALENDIJK – Den anochi di djabièrnè manisé djasabra a kibra drenta na 123 Car Rental. Segun e kompania di hür outo e daño okashoná tabata hopi. Tambe a hòrta un outo, ku despues a lokalisá kimá bèk.

Tambe e sospechosonan a bai ku un kaha fuerte. Den un anunsio riba Facebook e kompania ta bisa ku no tin sèn den e kaha fuerte, pasobra no ta traha ku sèn kèsh den e kompania. Sí a hòrta yabinan di outo.

123 Car Rental ta duna un rekompensa pa esun ku trese e yabinan bèk òf ku ta duna e “tep di oro” ku ta kondusí pa haña nan bèk.

E kompania ta enfatisá ku e yabinan tin tiki balor pa e sospechosonan, pero si ta di sumo importansia pa e kompania di hür outo. No ta konosí si a hasi detenshon ainda.