KRALENDIJK – Entidat Públiko Boneiru (EPB) ta hasi un yamada na habitantenan pa bin rebibá i deskubrí storia di Fontein. Segun EPB, ta trata di un dia di famia perfekto pa eksperensiá nos storia, nos historia i nos kultura.
Un Canon ta un liña di tempu moderno den kua eventonan importante, hende, lokalidat, edifisio, músika, baile, i historianan di Boneiru ta bini huntu. E proyekto ta parti di e Agènda di Akshon di Pasado di Sklabitut i ta wòrdu ehekutá dor di direktorado Komunidat i Kuido di Entidat Públiko Boneiru.
Direktorado di Planifikashon i Desaroyo a traha riba restourashon di e bakinan di awa i mehorá e aksesibilidat di Fontein. Durante e promé Dia di Canon di Boneiru dia 17 di mei, residentenan lo tin e oportunidat pa eksperensiá e lugá spesial akí pa nan mes.
Enkuentro, kultura i un sentido di komunidat ta tuma e atenshon sentral durante e dia akí. Bishitantenan por partisipá na vários aktividat pa grandi i chikí. E programa ta kuminsá for di 9 ‘or di mainta i lo dura te 5 ‘or di atardi ku hinter un programa di actividad, manera tayer, un almuerso i kontamentu di historia.
Ku e programa akí, EPB tin komo meta pa krea espasio pa konekshon, kompartí konosementu, i kreatividat den e komunidat. Un i tur ta bon biní pa huntu eksperensiá e promé Dia di Canon na Boneiru.
Bùs
Komo parti di Dia di Canon na Fontein, ta bai tin servisio di bùs grátis pa duna e residentenan e oportunidat pa bishitá e aktividatnan.
Debí na parkeo limitá, bùsnan lo kore bai Fontein spesífikamente pa Dia di Canon. P’esei nos ta pidi públiko kariñosamente pa hasi uso di e liña di bùs spesial akí.