SABA — Outoridatnan na Saba a kontinuá djaweps ku e búskeda intensivo di e kanadó Hulandes Erik Matthijsen, ku desde kuminsamentu di e siman aki ta perdí durante un kaminata den besindario di Well’s Bay.
A mira Matthijsen, un bishitante di e isla i miembro di tim di Mount Scenery Tower Project, pa último biaha djarason den kareda di 11’or. Outoridatnan a deskribié komo un kanadó eksperensiá.
Servisionan di emergensia a start un akshon di buskeda na gran eskala kaminda Saba Conservation Foundation (SCF), Wardakosta, Marinirnan, KPCN, BKCN, boluntarionan i otro partnernan den krísis ta embolbí. Imáhennan di kámara i investigashon di kamindanan pa keiru a yuda limitá e área di buskeda na e region entre Middle Island i Sulphur Mine trail.
Timnan na tera a buska tur kaminda ku ta konosí pa keiru, inkluso posibel rutanan fuera di e kamindanan ei i miradónan, mientras a ehekutá akshonnan kantu di kosta i den laira ku drone, un barku di Wardakosta, sosten di helikòpter i un avion di patruya DASH. Tambe a usa dronenan térmiko i kámaranan portatil durante operashonnan den anochi.
Outoridatnan a duna di konosé ku akshonnan di búskeda no ta tuma lugá durante madrugá pa garantisá siguridat di e personal di reskate, ounke ku ta kontinuá henter madrugá ku akshonnan den laira ku aparatonan térmiko.
Gezaghebber Jonathan Johnson a laga sa ku e timnan di búskeda ta sigui komprometé kompletamente pa haña Matthijsen i a kuminsá djabièrnè mainta atrobe ku e akshonnan di búskeda na tera.
Outoridatnan a hasi un yamada na públiko pa no bai kamindanan di keiru den e área aktivo di búskeda i pa no realisá akshonnan propio di búskeda, ku e atvertensia ku esaki por stroba e esfuersonan pa salba i por trese riesgonan èkstra pa siguridat. Ta habri Ladder Bay-trail bèk pa uso públiko djabièrnè mainta.
Ta súplika tur hende ku tin informashon di paradero di Matthijsen pa tuma kontakto ku servisionan di emergensia via 911.