SANTANDER – E nabegante ku barku di bela Nicole van der Velden (30) ku a lanta na Aruba ta pará ku Tim España ariba den e kampionato internashonal SailGP, un di e serinan di nabegá mas prestigioso i spektakular na mundu. “Mi no a pensa nunka ku lo mi a kompetí riba e nivel aki. Pero esaki ta netamente loke mi ke hasi,” Van der Velden ta bisa for di Santander, kaminda e tim ta entrená.
Dia e tabatin ocho aña e atleta, ku a nase na Spaña, a muda pa Aruba i a lanta einan den e ambiente di windsurf. Awor e ta nabegá riba katamaran-F50 ku ta foil ku velosidat di kasi 100 km pa ora riba awa. E ta miembro fast di e tim Spañó SailGP, ku ta bou di guia di Diego Botin.
”Nos a gana e último dos eventonan, na San Francisco i New York,” e ta konta. “Awor ta kuminsá e gira Europeo. E meta ta pa fin di aña nos ta pará den e tòp tres, di moda ku nos por partisipá den e final na Abu Dhabi.”
Raisnan Olímpiko na Aruba
Su karera deportivo estelar a kuminsá na Aruba. “Mi tabata e úniko ku tabata nabegá den mi kategoria, pues tabata difísil pa ègt push mi. Pero na 2010 mi a haña un wildcard pa Weganan Olímpiko Hubenil na Singapore. Einan e kandela a lanta di bèrdè.”
Potrèt : Privecollectie Nicole van der Velden
Na 2016 Van der Velden a representá Aruba na Weganan Olímpiko na Rio de Janeiro, huntu ku Thijs Visser den kategoria Nacra. “For di e momento ei e bala a kuminsá lora di bèrdat den direkshon di mundu profeshonal.”
Sinembargo despues el a kambia pa Spaña: “Na Rio mi a hasi e eskoho ei. Finalmente Aruba ta naturalmente un isla chikitu i ta hopi difísil sin un struktura su tras. Den e kampaña ei nos mester a hasi tur kos nos mes – no tin coach fultaim, buska spònsernan bo mes ... esei tabata basta pisá.”
Spaña ta sinti manera kas
Ounke e tin pasport Hulandes i Venezolano tambe, el a skohe finalmente konsientemente pa Spaña. “Mi tabatin bon opshonnan aki i pa un òf otro motibu mi kurason tabata duna nèt un tiki mas pa Spaña. Aki ta parse Aruba mas ku Hulanda pa loke ta trata ambiente. Mi ta sinti mi hopi na kas.”
Mientrastantu e ta un miembro fiho den e tim Spaño SailGP, kaminda e tin un ròl importante. “Mi ta yuda den situashonnan di boto – por ehèmpel si nos por pasa, i unda tin otro boto. I na momento di maniobranan kompliká mi ta stür tambe, por ehèmpel si Diego no ta na tempu na otro banda di e boto.”
E botonan den SailGP ta alkansá velosidatnan haltu. E mihó koredonan di mundu ta nabegá un par di aña kaba den e kategoria aki. Tòg tin momentonan peligroso ku choke, botonan ku ta kèntel òf dal den otro. “Nos ta atrapá den hárnas na un liña. E ta mustra mas peligroso ku e ta, pero tur kos ta sigurá te den detaye. E ta duna e impreshon di ta mas bou di kontrol awor ku e programa nobo,” e ta splika tokante kompetí ku e katamaran ultramoderno.
Potrèt: Andrew Baker / SailGP
Ambishon di oro na Los Angeles
Banda di su kampaña profeshonal den SailGP Van der Velden ta traha tambe na un kampaña olímpiko den kategoria Nacra, huntu ku un ganadó di medaya bròns di Tokyo. “Nos a kaba kuminsá. Nos ta kere enberdat ku nos tin e nivel pa bai pa oro. For di komienso nos a palabra esei ku otro.”
E kampañanan anterior pa Tokyo i Paris no a funshoná pa Van der Velden. “Mi tabata si e pais ku tabata kalifiká pa mas tantu tempu, pero a hera e selekshon interno. Esei tabata frustrante, pero mi a siña hopi.”
Potrèt: Privecollectie Nicole van der Velden
Laso ku Aruba ta keda
Ounke mientras tantu e ta traha fultaim na Spaña, su laso ku Aruba ta keda fuerte. “Mi ta sinti su falta si. Mi tata ta biba einan ainda. Pero mi no a bai einan e último dos añanan. Tempu ta tiki – i ora mi ta liber, mi ta uza e tempu mayoria biaha pa rekuperá.”
“Mi ta sintimi ainda konektá ku e isla. Ora mi mira ku otro deportistanan Arubiano logra algu, esei ta toka mi. Bo ta sinti ku bo ta pertenesé einan. Aruba ta keda semper un lugá spesial den mi kurason.”
Potrèt: Privecollectie Nicole van der Velden
Plannan pa futuro?
Loke ta bini despues di e kampañanan aki, Van der Velden ta laga habrí. “Mi no ta un hende ku ta plania hopi delantá. Mi ta bai di ola pa ola,” e ta bisa ku un sonrisa. “Pero lo mi gusta si pa un dia por kompartí mi eksperensianan ku otronan. Na Aruba tin asina hopi talento.”
“Kada biaha ku un hende logra algu, bo ta mira ku e ta motivá e generashon su tras tambe. Esei ta e kos ku mi ta haña mas bunita.”
Nicole van der Velden ta papia Hulandes, Spañó, Ingles i Papiamentu i ta un ehèmpel poko komun di un hende muhé Arubiano ku ta mantené su mes na e nivel di nabegá mas haltu internashonalmente. Ku mas kareda den futuro den e temporada SailGP e título mundial ta na su alkanse.