KRALENDIJK – Turtuga no ta konosé frontera. P’esei ta importante pa e islanan traha huntu pa protehá nan. Representante di Boneiru, Kòrsou, Saba, Sint Eustatius i Sint Maarten a reuní resientemente na Boneiru. Nan a kompartí eksperensia, risibí entrenamentu práktiko i papia tokante e siguiente pasonan pa e Sea Turtle Recovery Action Plan (STRAP).
Ministerio Hulandes di Agrikultura, Piskeria, Seguridat di Kuminda i Naturalesa ta finansiá e proyekto. Sea Turtle Conservation Bonaire (STCB) ta implementá e proyekto den kolaborashon ku Wereld Natuur Fonds. “Amplia konosementu i abilidat i duna tayer ta partinan importante di STRAP. Esaki ta loke e tayer i nos reunion anual ta trata. Dor di traha huntu, nos por logra mas pa turtuga i pa hende riba nos islanan,” Kaj Schut di STCB ta bisa.
Pòtret: STCB
Durante e tayernan, e partisipantenan a risibí tayer práktiko den diferente área di konservashon di turtuga. E islanan tambe a kompartí eksperensia i papia tokante maneranan pa mehorá nan trabou. “Pa e tim di Saba, esaki tabata e promé biaha ku nan a mira webu di turtuga di serka. E tayernan a duna nos eksperensia práktiko balioso pa monitòria i investigá e nèshi despues ku e turtuganan a sali for di e nèshi. Nos a siña tambe kon pa kue, midi i “tag” turtuga den awa,” Bob Sesinkclee di Saba Conservation Foundation ta bisa.
Turtuga di laman ta biba den Karibe pa miones di aña kaba, pero awe nan ta enfrentá hopi menasa. Esaki ta inkluí pèrdida di lugánan di nèshi, malesa, lus artifisial ku ta konfundí turtuganan chikí i dalmentu ku boto.
Potrèt: STCB
Dil ku menasa
STRAP ta yuda Boneiru, Kòrsou, Saba, Sint Eustatius i Sint Maarten pa atendé e menasanan aki huntu. E plan ta deskribí akshon ku por yuda e poblashon di turtuga rekuperá. E sinku islanan tin diferente rekurso, konosementu i organisashonnan. Dor di traha huntu, nan por siña di otro. Asina kada isla no mester buska solushon pa su mes. Nan por tambe kolektá dato di un manera mas konsistente i traha huntu pa atraé finansiamentu i sosten. E enfoke regional akí ta yuda fortalesé konservashon di turtuga riba tur sinku isla.