ORANJESTAD – Wardakosta a arestá djaweps sinku hòmber na Playa Turtuga i a interseptá mas ku trinta paki di droga. Ta trata di un Kolombiano i kuater Venezolano. Remarkabel ta ku ta unidatnan Arubano a hasi e kaptura kompletamente riba nan mes: operashonnan Merikano no a detektá e boto sospechoso ku último lunanan ta aktivo den e region.
E akshon a kuminsá mainta tempran ora ku e Sentro Marítimo Operashonal a mira movishon di un boto sospechoso direkshon di Aruba. Despues di e notifikashon Wardakosta a enbolbí Punto di Apoyo Aruba. Un boto di patruya a sali i un avion Dash-8 a lanta pa lokalisá e boto. Polis tambe a bai direkshon nortost di e isla.
E avion a deskubrí e boto na Playa Turtuga i a bati alarma serka e otro unidatnan. Den koperashon estrecho ku polis a arestá e sinku hòmbernan einan.
Wardakosta a interseptá mas ku trinta pakete grandi di droga, ku segun tin entendí kada unu ta kontené mas pakete chikitu. Mientrastantu a destruí e karga.
E kaptura ta e promé intersepshon despues di hopi tempu. E laman rondó di Aruba tabata relativamente trankil e lunanan ku a pasa, debí tambe na e mishon ámplio anti droga Merikano den área di Karibe.
Wardakosta ta mira e echo ku e kontribushon Merikano no a deskubrí e boto sospechoso, pero e servisionan lokal si, komo un prestashon operashonal propio importante.