KRALENDIJK – Kolegio ehekutivo di Boneiru a instalá un komishon independiente ku mester definí un vishon di futuro ku base ámplio pa e isla direkshon di 2050. E komishon ta bou di liderato di Frits Goedgedrag, èks gezaghebber di Boneiru.
Kolegio ehekutivo a konstatá ku Boneiru ta pará dilanti eskohonan importante ku bista riba desaroyonan den futuro. E isla mester desaroyá awor e polítika korekto pa dobla tendensianan indeseá i garantisá un desaroyo próspero pa e komunidat.
E dokumento di vishon mester duna direkshon na tumamentu di desishon tokante planifikashon urbano, ekonomia, naturalesa, kultura i komunidat. E vishon mester splika kiko Boneiru ke mantené, unda e ke krese i kon ekonomia, kultura i naturalesa ta keda den balansa.
Tambe e vishon mester sirbi komo guia pa futuro lei i reglamento, desaroyo di maneho i invershon tantu riba nivel lokal komo di Reino. E mester ta transparante tambe pa loke ta trata strategia di implementashon, prioridat i bon maneho.
Banda di presidente Frits Goedgedrag, ku entre otro ta èks prokuradó general i èks gobernadó di Antianan Hulandes i Kòrsou, e komishon ta konsistí di kuater otro miembro. Nan ta Joanne Balentien-Nicastia (direktor finansiero di WEB Boneiru), Paul Comenencia (miembro di Konseho di Estado), Giordano Molina (direktor general di operashon Aeropuerto Internashonal Boneiru) i Koert van Buiren ( direktor Ofisina Ekonómiko Amsterdam).
Ofisina Ekonómiko Amsterdam, ku tin eksperensia ku investigashon finansiero i ekonómiko-sosial na Boneiru i e otro islanan di e parti Karibense di Reino, ta enkargá ku sekretariado.
Pa su trabou e komishon ke hasi uzo di investigashon aktual tokante desaroyonan na Boneiru. Tambe e ta buska afiliashon serka formanan rekonosé di koperashon i foronan di diálogo riba e isla.
Den luna di ougùstùs representantenan di e komishon ta buska kontakto ku organisashon – i personanan ku por kontribuí na desaroyo di e vishon pa futuro. E komishon ke entregá konseho ehekutivo, stakeholder i organisashonnan sosial e dokumento di vishon pa mas tardá den luna di yanüari 2026.