KRALENDIJK - Edukashon Kultural Artístiko di Kalidat, EKADK ta kontentu di por sostené e proyekto di buki di musik “Kantika di tur tempu pa semper”. Un publikashon riku na informashon riba orígen i letra di algun piesa típiko Boneriano.
Esaki ta riba enkargo di Entidat Públiko Boneiru; Edukashon i Bienestar i SKAL. EKADK ta enkargá ku distribushon di e bukinan di manera ku tur skol por dispone di tantu publikashon di tomo I i tomo II. Ademas, EKADK ta bai traha huntu ku skolnan pa desaroyá lèsnan kaminda muchanan por siña kanta e kantikanan tradishonal aki.
“Kantika di tur tempu pa semper” a wordu desaroyá ku e meta pa preservá letra- i melodia oríginal di kantikanan oral folklóriko. E kantikanan oríginal akí ta data for di tempu di sklabitut, banda di esnan ku a originá despues di segundo guera mundial. Kada kantika tin su historia mará na dje i ta basá riba realidat. Danki na e kolaborashon entre Denise de Jongh-Rekwest via su editorial Request Publishing, OLB/SKAL i EKADK, huntu ta fortalesé edukashon kultural den enseñansa.
Den e periodo ku ta bin, lo distribuí e bukinan na tur skol. Tambe lo organisá entrenamentu i aktividat pa maestro(a)nan i alumnonan. Durante e seshonnan akí, skolnan lo risibí sosten pa asina por hasi uso efektivo di e materia di lès i pa integrá músika i kultura den klas.
Riba foto por mira momtentu ku e outor ta hasi entrega di e bukinan na Kolegio San Bernardo i Kristu Bon Wardador.