KRALENDIJK – Mas ku tresshen studiante a kuminsá djaluna último ku nan èksamennan final. Na vmbo, havo i vwo a kuminsá ku e materia Papiamentu. E simannan benidero ta sigui ainda desena di èksamen sentral i pruebanan práktiko.
Segun e direktor, Dennis Volmer, e aña aki mas ku 300 alumno ta pasa èksamen. “Segun mi nos tin alrededor di 314 kandidato, ounke semper bo ta haña na último momento ku tin alumno ku ta retirá,” e ta bisa.
E skol ta ripará ku e kantidat di kandidato pa èksamen a sigui krese e último añanan. “Den liña general nos ta mira un oumento,” segun Volmer. E resultadonan di aña pasá tambe ta hunga un ròl, pasobra tin alumno ku a bai malu e tempu ei i awor ta pasa èksamen di nobo.
Espektativanan positivo
Ounke ta keda difísil pa hasi un pronóstiko, e promé señalnan ta positivo segun Volmer. “Riba kasi tur nivel e sifranan di èksamen eskolar ta algu mihó ku aña pasá. Pues e tendensia ta bon,” e ta bisa. Spesialmente pa vmbo e ta premirá mihó resultado ku aña pasá.
Mientrastantu tin un ambiente bon kla di èksamen. “Tin un sorto di tenshon salú,” Volmer ta bisa. “No solamente bou di alumnonan, pero tambe bou di dosentenan. Tur hende ta konbibí ku otro.”
Manera tur aña e promé dianan di èksamen no ta pasa sin strès. “Bo ta hañá bo semper ku un òf dos alumno ku ta pèrdè ariba i ta kore drenta nèt na tempu,” Volmer ta bisa hariendo.
Ta spera di por anunsiá e resultadonan di èksamen 11 di yüni. Despues ta sigui ainda repasonan di èksamen, pa finalmente na kuminsamentu di yüli tin entregamentu di diploma.