WILLEMSTAD – Un petishon online tokante akseso na playanan di Kòrsou a haña den korto tempu sentenares di firma. E petishon, ku ta online for di djamars anochi, a haña dentro di dos ora 260 respaldo kaba.
Un inisiadó a kuminsá e akshon bou di e nòmber “Kosta liber’. No ta menshoná un nomber real.
Ku e petishon e inisiadónan ta pidi atenshon pa e playanan ku segun nan ta birando mas i mas difísil aksesibel pa habitantenan di Kòrsou. Nan ta mustra ku e asuntu ta bai mas leu ku solamente rekreashon. Segun nan kultura, tradishonnan i e laso di habitantenan ku kosta tambe ta bou di preshon ora e akseso públiko disparsé.
Panorama general públiko di akseso pa playa
E inisiadónan ta deseá ku parlamento ta pidi gobièrnu pa traha un panorama general públiko di tur playa na Kòrsou i nan aksesibilidat. Den e panorama mester aklará unda e entradanan públiko ta, si tin kaminda- òf rutanan públiko ta bai e playa, ken ta manehá e entrada i kua ta e solushonnan ku ta ofresé ora ta limitá òf sera e entrada.
Segun e inisiadónan na e momento aki no ta kla ainda kua di e playanan públiko ta aksesibel i kon e habitantenan por yega einan.
“Nos laman, sin barera”
Den e yamada ta enfatisá ku playanan tin un funshon sosial i kultural importante pa hopi Yu di Kòrsou. Ta sitionan kaminda famianan ta bini huntu, muchanan ta siña landa i piskadónan ta kontinuá ku nan tradishonnan.
Ta p’esei e inisiadónan ta yama akseso liber na playanan públiko un derecho fundamental i ta atvertí ku partinan di kosta ta birando poko poko ménos aksesibel pa e poblashon lokal.
Por haña e petishon via: https://www.change.org/p/eksig%C3%AD-akseso-p%C3%BAbliko-na-tur-playa-di-k%C3%B2rsou