KRALENDIJK- Riba djaweps Tourism Corporation Bonaire (TCB) den kolaborashon ku Bonaire Hotel and Tourism Association (BONHATA), Bonaire International Airport (BIA) i kapitan di haf di Entidat Públiko Boneiru, eksitosamente a organisá e promé ‘Bonaire Tourism Update’ di kada tres luna pa aña 2026 na Van der Valk Plaza Resort Bonaire.
E seshon di informashon konhunto a atraé mas ku 100 partisipante, inkluyendo partnernan importante for di e sektor, empresarionan lokal i miembronan di prensa. E asistensia grandi i partisipashon aktivo a destaká e interes grandi ku nos komunidat tin pa e prestashonnan i pa futuro di Boneiru su ekonomia.
Durante e presentashon, TCB i su partnernan a kompartí un kantidat grandi di dato, sifra di prestashon i konosementu stratégiko. E seshon a enfoká prinsipalmente riba sifranan resien di turismo, ku un splikashon detayá di prestashon di e sektornan na nos isla, pa loke ta trata estadia, turismo krusero i pasaheronan aéreo. TCB a duna tambe un bista general amplio di e inisiativanan di merkadeo, enbolbimentu di nos komunidat lokal, e inisiativanan di desaroyo di produkto i e aktividatnan promoshonal ku a keda ehekutá eksitosamente den e tres lunanan tras di lomba pa fiha atenshon di biaheronan riba Boneiru.
Banda di un bista bèk riba e prestashonnan di den pasado, durante e presentashon nan a duna tambe un bista padilanti pa loke ta trata sobrá di aña 2026.
“Nos ta kontentu ku e enbolbimentu fuerte di nos partnernan, mundu empresarial i prensa durante e seshon”, asina Elesiër Angel, direktor di TCB a bisa.
Direktor di TCB, Elisier Angel durante su presentashon.
(Pòtret: TCB)
Tendensia
E ‘briefing’ eksitoso a kombiná datonan esensial di e sektor di Veroesjka de Windt, direktor di BONHATA, a ilustrá e tendensianan aktual den hóreka i importansia di e sektor.
Giordano Molina, direktor operashonal di BIA, a papia tokante e kresementu resien di e kantidat di pasahero na aeropuerto i tokante aktualisashonnan esensial tokante modernisashon di e infrastruktura.
Finalmente Günther Flanegin, kapitan di haf, a presentá informashon importante tokante e tráfiko di pasahero krusero i tokante maneho di haf.
Un bista di e públiko durante e konferensha.
(Pòtret: TCB)