KRALENDIJK - Na Harbourside Shopping Mall diasabra atardi a tuma lugá apertura di un tienda nobo spesialisá den kuido di kabei, basá riba un konsepto ku anteriormente a demonstrá su eksito na Korsou. Tras di e inisiativa ta e kompania kurasoleño Bremar Agencies di famia Hollander, ku ta aktivo pa mas di sinkuenta aña komo representante di diferente liña di kosmetika na Kòrsou i den region.
E konsepto nobo a wòrdu introdusí aproksimadamente un aña i mei pasá na Kòrsou komo un asina yama "blow bar": un formula aksesibel kaminda klientenan, i en partikular senhoranan, por drenta libremente despues di, por ehemplo, un dia na laman, por pasa pa drecha kabie di forma rápido sin mester a hasi un sita manera na un salòn mas ofisial.
Segun Bremar Agencies, e konsepto a pega bon na Korsou, despues di kua a surgi e idea pa trese e formula Boneiru tambe.
Algo speshal na e tienda ta ku un kantidat enorme di produkto profesional di kabei, ku normalmente ta disponibel prinsipalmente via beauty salon, awor ta wòrdu ofresi direktamente na konsumidónan. Bandi di produktonan pa kuido di kabei pa hende muhé, e negoshi ta ofresé tambe hopi produkto pa kabayero, ku un linea hopi amplio di por ehèmpel produkto pa barba i pa feita.
Famia i konosínan di famia Hollaner i invitadonan a probechá di wak paden i kumpra algun produkto, promé ku tur otro hende.
(Pòtret: ABC Online Media )
Bon bishitá
E apertura djasabra merdia a hala bastante hende. Diferente invitado a hasi uso di e oportunidat pa wak kiko tur tin, i hasi kompra di algun produkto.
E tienda nobo lo habri ofisialmente djaluna su portanan pa públiko.