KRALENDIJK – Qredits Boneiru den komienso di e siman aki a lansa e di dos edishon di e Qreative Business Academy (QBA), un programa destiná pa empresario den e sektor kreativo i kultural na Boneiru, Saba i Statia. E edishon aki ta wòrdu organisá den kolaborashon ku e Platform pa e Merkado di Trabou den Futuro Kultural i Kreativo (Platform ACCT).
Danki na e kolaborashon aki, 50 porshento di e gastunan di inskripshon di partisipantenan ta wòrdu kubrí atrobe, basta ku nan a kaba e programa ku éksito. E organisashon ta basá riba e eksperensia di e promé edishon ku a tuma lugá aña pasá.
Qreative Business Academy ta un vershon adaptá di e Small Business Academy di Qredits, diseñá pa profeshonalnan kreativo manera musikantenan, DJ’s, artistanan, kosedo i i hende ku ta traha hoya. Durante e programa, partisipantenan ta traha riba nan plan di negoshi i finansiero, i ta risibí guia den área manera marketing, análisis kompetitivo i estruktura di kosto.