KRALENDIJK - Un lugá ku pa hopi aña tabata símbolo di músik, kultura, unidát i hospitalidát a wòrdu golpeá duru pa un kandela grandi. Un parti di e kunuku di e Boneriano kerí ‘Payo’ a kima resientemente. Pa motibu di e kandela no solamente a pèrdè hopi material, pero e ciudadano tambe a keda sin awa òf koriente.
Miembronan di famia a kuminsá un akshon di apoyo pa yud’é rekonstruí su bida i su lugá speshal di enkuentro.
"Su kunuku semper tabata un lugá kaminda tur hende tabata bon biní" famia ta bisa. "Hende tabata bin huntu pa toka, storianan, un momento ameno i un apoyo. Si bo tabatin mester di yudansa, bo kier siña toka òf simpelemente tabatin mester di un orea pa skuchabo, serka Payo semper tabata habri."
E kandela a tin un impakto duru riba bida diario di Payo. Sinembargo, famia ta spera ku huntu ku e komunidat nan por repará e dañonan. E fondonan ku e akshon lo generá lo wòrdu uzá pa rekoneká servisionan básiko manera awa i koriente i pa has e reparashonnan mas urgente.
E famia ta hasi un apleashon riba tur hende ku por, pa hasi un kontribushon òf yuda kompartí e mensahe. "Huntu nos por mustra ku un hende ku semper tabata pará pa otronan, awendia no ta pará su so."
Te diasabra mainta 9 mei, a rekolektá 3.235 dòler. E famia ta spera di rekolektá un suma di masoménos 10.000 dòler. Donashon por wòrdu hasi via e página akí.