KRALENDIJK - For di awe, 1 di òktober públiko por vota den e elekshon di Mihó Biblioteka di Hulanda 2026. Biblioteka Públiko Boneiru, manera a bira konosí anteriormente den e aña akí, komo e úniko biblioteka di Hulanda Karibense, tin chèns pa haña e título akí. Te ku final di òktober kada voto ta konta.
Vota
Por vota te ku fin di òktober 2026 via www.bibliotheekblad.nl/stem. E lenk ta disponibel tambe via e wèpsait i media sosial di biblioteka. E ta tuma ménos ku un minüt, i kada voto for di Boneiru i pafó di Boneiru ta oumentá e chèns pa gana e título.
Tokante e nominashon i e elekshon
Tur aña NBD Biblion ta organisá e elekshon Mihó Biblioteka di Hulanda, den kolaborashon ku Bibliotheekblad i Probiblio. E aña akí un grupo di hurado profeshonal a selekshoná sinku biblioteka nominá a base di, entre otro, envolvimentu den komunidat, programashon, kolaborashon ku partnernan, kolekshon, servisio i aparensia. Banda di Biblioteka Públiko Boneiru, Bibliotheek Hellevoetsluis, Bibliotheek Horst aan de Maas, Bibliotheek Nijkerk i Bibliotheek Warenhuis Oss ta nominá. Biblioteka Públiko Boneiru ta e úniko nominá for di pafó di Hulanda Oropeo. Lo anunsiá e ganadó dia 5 di novèmber 2026.
Un biblioteka ku ta krese lihé
Ta hasi e nominashon na momento ku biblioteka hasi un kresementu remarkabel. For di momentu ku e lokalidat aktual na Kaya Amsterdam a habri na mart 2025, diseñá pa e ofisina di arkitektura Includi segun e prinsipio di ‘Third Place’, ku un énfasis fuerte riba e identidat boneriano, e kantidat di miembro a krese di ménos ku 4% pa mas ku 15% di e poblashon. Te ku ougùstùs 2026, biblioteka a atraé mas ku 120.000 bishitante kaba.
“E nominashon akí ta un konfirmashon di loke nos a konstruí huntu ku nos tim, nos boluntarionan i henter Boneiru: un lugá kaminda tur hende ta bon biní i ta sinti nan mes na kas, kaminda bo ta topa otro hende i deskubrí tur loke bo por hasi. Ku nos ta e úniko biblioteka di Hulanda Karibense ku ta kompetí pa e título nashonal akí, ta algu ku henter Boneiru por ta orguyoso di dje. Nos ta spera ku tur hende ku ta karga biblioteka den nan kurason, ke vota pa nos na òktober.”
Reakshon direktor — Jennifer Pocornie Martis, direktor Biblioteka Públiko Boneiru
Tokante Biblioteka Públiko Boneiru
Biblioteka Públiko Boneiru ta e lugá di enkuentro aksesibel i inspirativo pa kresementu i desaroyo di tur hende na Boneiru. For di 1 di ougùstùs 2026, biblioteka ta un fundashon independiente i ta ofresé un oferta multilingwe na papiamentu, hulandes, ingles i spañó.
Pa mas informashon: www.bibliotheekbonaire.com / Facebook: Biblioteka Públiko Boneiru / Instagram: BibliotekaPúblikoBoneiru