KRALENDIJK - E edishon 2026 di Kings of the Bario a yega na su final diadomingo na Wilhelminaplein, despues di tres wikènt yen di basketbòl, kompetensia i union, ku un final apropiá den kurason di Kralendijk.
Kings of the Bario a keda un torneo verdaderamente lokal, ku tur e hungadónan partisipante ta biba i hunga basketbòl na Boneiru. Na mes momento, e hungadónan a reflehá e diversidat di nos isla, ku raisnan den Boneiru, Kòrsou, Hulanda, Statia, Haiti, Republika Dominikana, Venezuela i China. Riba cancha, tur e diferente backgroundnan ei a bin huntu den un solo idioma: basketbòl.
Un dia di final imprevisibel
E dia final a mustra un biaha mas kon imprevisibel basketbòl 3x3 por ta. Dos di e favoritonan di e torneo, Belnem Burikus i Great Wall, tur dos a keda eliminá di forma sorprendente den semifinal. Team Rose a derotá Belnem Burikus 9–6, miéntras Bucket Island a logra un viktoria fuerte di 11–4 kontra Great Wall, loke a pone un final inesperá riba programa.
Den e final, Team Rose a kompletá un trayekto remarkabel ku un viktoria di 15–10 kontra Bucket Island, i asina a bira kampion di adulto di Kings of the Bario 2026. Team Rose a kuminsá e dia for di kuartfinal, loke ta nifiká ku nan mester a gana tres partido tras di otro pa yega na e título.
Kenroy Belleau a ser nombrá MVP despues ku el a guia Team Rose den tur tres viktoria riba e dia final, hungando un papel importante den nan trayekto for di kuartfinal te na e kampionato.
Den e final U15, team Thunder a derotá Team Lightning ku den extra tempu pa konquista e kampionato U15 di 2026.
Konstruyendo un tradishon
Despues di e éksito di e promé edishon, regreso di Kings of the Bario na 2026 ta un otro paso pa hasi e torneo un tradishon anual na Boneiru.
Na su base, Kings of the Bario ta trata di hasi basketbòl visibel. Dor di saka e cancha for di e sporthal tradishonal i pone’é na diferente lugánan riba e isla, e hungadónan ta haña un plataforma, miéntras hende por eksperensiá e deporte di serka.
Bonaire Basketball Federation ta ekstendé un danki sincero na INDEBON, Openbaar Lichaam Bonaire (OLB),prensa, tur sponsor i branding partner, e ekiponan partisipante, referee, voluntario, coach, mayornan i tur hende ku a kontribuí pa hasi Kings of the Bario 2026 posibel.
Ku un otro edishon kompletá, BBF lo sigui ku e momentum pa sigui krea oportunidat pa e hungadónan di Boneiru i sigui desaroyá basketbòl den diferente grupo di edat.
Pa Kings of the Bario, e ambishon ta keda simpel: sigui krese, sigui trese basketbòl na e pueblo, i bolbe na 2027 pa un otro edishon.