KRALENDIJK – Djamars Tweede Kamer a rechasá un proposishon pa ofresé habitantenan rondó di lèntfel di Selibon un chekeo di salú anual. E moshon di miembro di 50PLUS, Miembro di Kamer Corrie van Brenk a haña sosten di entre otro PRO, SP, Volt, Partij voor de Dieren, DENK i ChristenUnie, pero insufisiente sosten pa asept’é.
Van Brenk a entregá e moshon relashoná ku e balornan di dioksina ku a oumentá fuertemente den e kadena alimentísio rondó di e lèntfel. Den e moshon e ta referí tambe na e komunikashon entre GGD i Entidat Públiko Boneiru (OLB). Segun Van Brenk no a komuniká abiertamente tokante esaki pa evitá inkietut sosial. E ta bisa ku pa e motibu ei “ta parse ku ta skonde” riesgonan pa salú .
E moshon ta pidi gobièrnu pa tuma responsabilidat i ofresé habitantenan rondó di lèntfel Selibon, ku Pro Lagun ta representá, un chekeo di salú aktivamente. Van Brenk tabata ke pa ripití despues e kontrol aki tur aña.
D66: preukupashon di habitantenan ta na su lugá
D66 a vota kontra e moshon, pero a enfatisá ku mester tuma e preukupashon di e habitantenan na Boneiru hopi na serio. Miembro di Kamer Marc Vervuurt ta bisa ku personanan ku tin añanan largu ta biba banda di un lèntfel i ta eksperensiá molèster, mester por sa kiko esei ta nifiká pa nan mes i nan famia.
Solamente no ta kla pa Vervuurt kon e chekeo di salú ta kontribuí efektivamente na esei. D66 ta puntra su mes kiko mester midi presis, ku ki frekuensia esei mester sosodé i kiko lo por hasi despues ku e resultadonan.
“Nos prioridat ta pa solushoná problema i buska medidanan ku por yuda efektivamente”, segun Vervuurt. E ta di opinion ku e moshon ta mustra insufisientemente kla kon un chekeo di salú karu por kontribuí na esei. P’esei D66 no por a sostené e proposishon.
E diskushon tokante salú di e habitantenan tin basta tempu andando. E moshon di Van Brenk ta kuadra ku e sansaña resientemente tokante balornan haltu di dioksina ku a haña den e kabritunan rondó di lèntfel Selibon. Ku esaki Tweede Kamer a pone e asuntu di nobo enfátikamente riba agènda.